(22.11.2009 RV)Përfundoi dje në Vatikan Konferenca XXIV ndërkombëtare, organizuar
nga Këshilli Papnor për punonjësit e shëndetësisë, me temë: “Effatà! Shurdhmemeci
në jetën e Kishës”. Të premten e kaluar, duke pritur pjesëmarrësit në Konferencë,
Papa i bëri thirrje shoqërisë t’u japë fund diskriminimeve të pajustifikueshme, që
pësojnë edhe sot njerëzit, të cilëve u mungon shqisa e dëgjimit. Njëkohësisht uroi
që njerëzimi të shërohet nga një formë tjetër e shurdhërisë, nga shurdhëria e shpirtit,
që ngre mure gjithnjë më të larta, për të mos e dëgjuar zërin e Zotit e të të afërmit,
posaçërisht britmën e njerëzve më të varfër, njerëzve më të vuajtur, duke e mbyllur
njeriun në guaskën e egoizmit të thellë e shkatërrimtar. Por, lidhur me këtë,
të ndjekim editorialin e Atë Federiko Lombardit, për Octava Dies, e përjavshme
informative e Qendrës Televizive të Vatikanit:
“Kam parë një çift të ri
bashkëshortësh: flasin vazhdimisht me gjuhën e shenjave: ai është i shurdhër, ajo
është veshi i tij e zëri i tij për të komunikuar me të tjerët. Duhet më shumë kohë
e më tepër durim për të komunikuar, por sigurisht nuk bëhet fjalë për një komunikim
të nxituar, të përciptë, si ai i zakonshmi, me të cilin jemi mësuar. Është komunikim,
që del nga shpirti e kalon përmes rrugës së jashtëzakonshme të dashurisë. Këto
ditë në Vatikan u mbajt një konferencë e bukur me temën e vendit që zënë shurdhmemecët
në jetën e Kishës: janë rregulltarët e rregulltaret, të cilët shkrijnë gjithë jetën
për ta bërë të mundur këtë komunikim; janë meshtarët, të cilët impenjohen, që shenjat
e sakramenteve të kapërcejnë murin e heshtjes, i cili e ndan të shurdhërin nga bota;
janë mjekët, që punojnë për ta parandaluar e për ta kapërcyer këtë handikap. Rreth
nëntëdhjetë nga të pranishmit janë shurdhmemecë e komunikojnë me gjuhën e gjesteve. Ndoshta
për këtë do të flitet pak. Të tjera janë problemet e Kishës, që ngjallin kureshtjen
e mediave. Por ne mendojmë se kjo është gjë e rëndësishme. Nuk i harrojmë lutjet e
këngët, shprehur me lëvizjen e duarve; fjalimin e Papës, përkthyer në gjuhën e gjesteve.
Besimtarët e dinë se në Gjyqin e mbramë Zoti – i cili këtu në tokë ua hapi veshët
të shurdhërve e ua zgjidhi gjuhën të pagojëve, ka për t’i pyetur: “Isha i shurdhër,
më ndihmuat të dëgjoj? Isha pa gojë, më ndihmuat të flas?” Janë pyetje, për të cilat
ia vlen të reflektosh!”.