Liturgjia e Fjalës së Zotit e dielës së 34-të kushtuar solemnitetit të Jezu
Krishtit, Mbret i gjithësisë! ‘B’
(21.11.2009 RV)‘Jezu Krishti Mbret dashurie që mbretëron në zemra tona!' Ja
përsëri në takimin tonë javor të së shtunës me Fjalën e Zotit të së dielës, kësaj
herët do të dëgjojmë dhe meditojmë së bashku leximet biblike të Liturgjisë së Fjalës
Hyjnore të dielës së 34-të e të fundit këtij viti kishtar, të ciklit të dytë, të cilën
Kisha ia kushton solemnitetit të Krishtit Mbret.Ja pra, dëgjues
të nderuar kemi mbërrijë në të dielën e mbramë të ‘Kohës së Rëndomtë të këtij viti’
liturgjik kishtar që mbyllet me këtë të diele. Para nesh kemi figurën e Jezusit, Mbretit
të Gjithësisë. Pas harkut kohor prej mëse dymijë vjetësh skena vazhdon të na bëjë
gjithnjë përshtypje. Në njërën anë kemi përfaqësuesin e pushtetit të Romës, të ushtruar
me forcën që vjen prej legjioneve ushtarake; në anë tjetrën kemi një njeri, që i përket
një popullit të nënshtruar, e të cilin pikërisht bashkëkombësit e tij duan ta dënojnë
me vdekje. Nga njëra anë gjykatësi, që ka mundësinë të dënojë apo lirojë; në anën
tjetër i pandehuri, i braktisur nga të gjithë, i akuzuar padrejtësisht, E megjithëkëtë
është pikërisht në këtë kontekst që Jezusi e shpall me thjeshtësi mbretërinë e vet.
Një mbretëri që nuk ka të bëjë asgjë me ato elemente apo tipare që zakonisht i karakterizojnë
mbretëritë, e megjithatë, përtej aspektit të dukshëm, mbretëria e Jezusit është e
vetmja mbretëri e vërtetë. Qysh në Besëlidhjen e Vjetër Danieli profet fliste për
një bir të njeriut të cilit Zoti i jep çdo pushtet dhe të cilit të gjithë popujt,
kombet e gjuhët i shërbenin (krh Leximi I). Kjo profeci u realizua në Jezusin:
ai është i vetëdijshëm se është Mbret, i paralajmëruar (profetizuar) dhe i pritur,
dhe këtë e dëshmon shumë qartë para Pilatit, por saktëson edhe faktin se Mbretërinë
e tij nuk duhet kërkuar me dhe në kategoritë njerëzore, pasi që Mbretëria e tij nuk
është këtu poshtë mbi tokë, pra nuk është e kësaj bote. (krh Ungjillin) Mbretëria
e Jezusit është një Mbretëri ku ligji është dashuria ndaj Zotit e të afërmit; drejtësia
quhet mëshirë, përdëllim; i afërmi e të tjerët nuk janë nënshtetas e të nënshtruar
por vëlla e vëllezër sepse janë bijtë të njëjtit Atë Qiellor; armët e Jezusit janë
Fjala, falja e urata. Ne që jemi të pagëzuar, në saje të hirit të Tij Hyjnor që
e kemi marrë dhuratë përmes Shpirtit Shenjtë Zot, qysh tani jemi pjesë e kësaj Mbretërie,
mirëpo sot nga Liturgjia e Fjalës së Zotit e kësaj së diele, jemi të ftuar ta ripërtërijmë
aderimin tonë të brendshëm dhe impenjimin për të punuar në mënyrë që Mbretëria e Jezusit
të shtrihet e të përhapet përherë e më shumë në botë, duke u nisura nga familjet e
shtëpitë tona. Këtë, të bindur se Jezusi është mbret i gjithësisë, se Mbretëria
e tij nuk është e kësaj bote, nuk mund të krahasohet me asnjë perandori historike,
e megjithëkëtë Mbretëria e Krishtit realizohet e ndërtohet në histori e kohë duke
i shndërruar ato. Në pyetjen e drejtpërdrejtë të Pilatit “a je ti mbreti i judenjve?”,
Jezusi përgjigjet, duke pohuar se është mbret, por në mënyrë absolutisht origjinale
(Ungjilli). Kështu Gjoni ungjilltar shpjegon se mbretëria e tij qëndron në dëftimin
e Tij Hyjnor, dmth në komunikimin e Zotit njerëzve. Në të vërtetë, Jezusi i mundëson
Zotit të jetojë në njeriun e njeriut i ofron mundësinë të ketë pjesë dhe të jetojë
në bashkim më Zotin. Komentin e leximeve biblike të kësaj së diele do të dëgjojmë
nga prifti shqiptar nga Tirana, don Gjergj Meta.
Leximi i parë (Dan 7, 13-14)
Lexim prej Librit të Danielit profet Unë po shikoja kështu në
vegimin e natës: dhe ja, në retë e qiellit, po vinte dikush si Biri i njeriut! Arriti
deri tek i Tejetlashti i motit dhe qe paraqitur para tij. Ai i dha pushtetin, nderin
e mbretërinë. Të gjithë popujt, fiset e gjuhët u shtruan nën shërbimin e tij: pushteti
i tij pushtet i amshuar që kurrë s’do të merret, mbretëria e tij kurrë nuk do të prishet.
Fjala e Zotit.
Psalmi 93 (92)
Ref: Hyji mbretëron!
U vesh me madhëri! ----------
Hyji mbretëron! U vesh me madhëri! Zoti
u vesh, me fuqi u ngjesh. ---------- Të palëkundshme e bëri botën: assesi
s’do të trandet! I patundshëm është froni yt që prejfillimit, ti je i amshueshëm! ---------- Dëshmitë
e tua janë plotësisht të besueshme, shenjtëria i përket Shtëpisë sate përgjithmonë
e jetës, o Zot. ----------
Leximi i dytë (Zb 1, 5-8)
Lexim
prej Zbuleses së shën Gjonit apostull.
Jezu Krishti është Dëshmitar
besnik, i Parëlinduri ndër të vdekur, Sunduesi i mbretërve të tokës! Atij që na do,
që na çliroi nga mëkatet tona me gjakun e vet, që na bëri Mbretëri, priftërinj për
Hyjin, Atin e vet, - Atij i qoftë lavdi dhe pushtet në shekuj të shekujve. Amen Ja,
po vjen me re dhe do ta shohë çdo sy edhe ata që e shporuan dhe të gjitha fiset e
tokës do të vajtojnë për shkak të Tij. Po! Amen! Unë jam Alfa dhe Omega - thotë Zoti
Hyj, - Ai që është, që ishte dhe që po vjen, i Gjithëpushtetshmi. Fjala
e Zotit
Ungjilli (Gjon 18, 33b-37)
Leximi i Ungjillit
shenjt sipas Gjonit
Në atë kohë, Pilati e pyeti Jezusin: “A je ti mbreti
i judenjve?” Jezusi iu përgjigj: “A e thua ti këtë prej vetvetes, apo ta thanë të
tjerët për mua?” Pilati u përgjigj: “Pse, a mos jam unë judeas? Populli yt dhe kryepriftërinjtë
të dorëzuan tek unë. Çka ke bërë?” Jezusi u përgjigj: “Mbretëria ime nuk është e
kësaj bote. Po të ishte Mbretëria ime e kësaj bote, ushtarët e mi do të kishin luftuar
që të mos u bija në dorë judenjve. Porse, Mbretëria ime nuk është prej këndej.” “Pra,
ti qenke Mbret?”- i tha atëherë Pilati. “Mirë thua! - iu përgjigj Jezusi - Unë jam
mbret! E unë linda dhe erdha në botë për të dëshmuar të vërtetën. Kush e do të vërtetën,
ai e dëgjon fjalën time.”