Përfundon pa rezultate misioni diplomatik i Obamës në Azi
(19.11.2009 RV)Barak Obama, “i pari president Paqësor” siç ka dashur të paraqitet
nga çasti i parë që shkel në Azi, e përfundon në Korenë e Jugut “misionin që u dallua
për mungesë të rezultateve konkrete por historia personale e presidentit doli në pah,
madje në plan të parë”. Kështu Uashington Post e përshkruan misionin aziatik të Obamës
duke kritikuar etapën e tij në Kinë dhe synimet e presidentit tashmë të njohura “biography
as diplomacy” “biografia si diplomaci”: me fjalë tjera bërjen e publikut për veti,
edhe atë të jug lindjes së Azisë përmes përdorimit të biografisë së tij e jo përmes
ndërmarrjeve e veprime reale e aktuale diplomatike. Sipas kësaj të përditshme, misioni
i gjatë i Obamës në Azi ka dështuar. “Obama kthehen në shtëpi pa asnjë kthesë e asnjë
provë që dëshmon për krijimin e lidhjeve personale me liderët rajonal”.
Gjithsesi,
Presidenti amerikan, Barack Obama, ka paralajmëruar se me 8 dhjetor do të dërgojë
një diplomat të lartë për bisedime të drejtpërdrejta me qeverinë e Koresë së Veriut,
me qëllim të përparimit të negociatave për programin kontestues bërthamor të këtij
vendi. Bisedimet duhet të hapin rrugën për vazhdimin e negociatave gjashtëpalëshe,
theksoi Obama pas takimit në Seul me presidentin e Koresë së Jugut, Li Mjung Bak.
Obama lavdëroi rritjen ekonomike në këtë vend, e cila ka bërë që Koreja e Jugut të
bëhet një prej faktorëve të rëndësishëm në skenën ndërkombëtare. Koreja e Jugut është
stacioni i fundit në vizitën nëntëditore të Presidentit amerikan në Azi.