Kryetari i Kishës Ortodokse serbe patriku Pavle u varros sot në manastirin e Shën
Mihillit Kryengjëll në Rakovicë.
(19.11.2009 RV)Mbi 100 mijë persona sot në Beograd morën pjesë në ceremoninë
e salikimit të Patrikut ortodoks Pavle, udhëheqësit shpirtëror të të krishterëve ortodoks
serbë, i cili vdiq të dielën e kaluar në moshën 95 vjeçare. Pas Liturgjisë së Shenjtë,
kremtuar nga Patriku ekumenik i Kostandinopojës Bartolomeu I në bashkëkremtim me
anëtarët e Sinodit të Shenjtë të Serbisë kremtuar në katedralen e Shën Mihillit Kryengjëll,
trupi i pajetë i Patrikut Pavle u bartë në procesion, shoqëruar nga shumë delegacione
shtetërore e fetare, drejt sheshit Terazije e në mbarim të ceremonisë përkujtimore
- drejt Tempullit të Shën Savës për kremtimin e ceremonisë së varrimit. Pranë Patrikut
Bartolomeut I, ishte mitropoliti serb Amfilohije, i cili e kujtoi figurën e patrikut
Pavle, i cili u varros në manastirin Rakovica në Beograd. Të pranishëm në ceremoni
presidenti serb Boris Tadiç, kryeministri Mirko Cvetkoviç, ministrat e qeverisë së
tij, kryebashkiaku i Beogradit Dragan Dilash, presidenti i parlamentit Slavica Dukiç-Dejanoviç.
Ndër pjesëmarrësit kujtojmë delegacionin e Vatikanit të udhëhequr nga dekani i kolegjit
kardinalor, hirësia e tij Angjelo Sodano, presidenti i Malit të Zi Filip Vujanoviç,
presidenti i Maqedonisë Gjorgje Ivanov e të tjerë.