Takimi ndërmjet Barak Obamës dhe Hu Zhintaos – një marrëveshje pa pyetje.
(17.11.2009 RV)Sot paradite presidenti amerikan Barak Obama u takua në Pekin
me presidentin kinez Hu Zhintao. Mjetet e informimit e quajtën ngjarjen prova për
një takim të madh të G2. Ishte kjo vizita e parë e presidentit Obama në Kinë e që
mori një domethënie të veçantë në arenën e marrëdhënieve ndërkombëtare. Gazetarët
më të njohur amerikanë e quajtën takimin ndërmjet dy presidentëve një “epokë të re
në marrëdhëniet ndërmjet SHBA dhe Kinës”, si formim të një boshti të ri aleance me
peshë ndërkombëtare. Ndoshta si përpjekje të SHBA për t’u lidhur me një aleat të fuqishëm
në Lindjen e largët duke kapërcyer ato tradicionalë si Evropa. Gjatë takimit Obama
dhe Hu Zhintao biseduan për bashkëpunimin mbi një varg çështjesh që lidhen me klimën,
tregtinë por edhe për Korenë e veriut, Iranin etj. Nga njëra anë presidenti Obama
foli për të drejtat e njeriut, për lirinë, për rifillimin e bisedimeve të kinezëve
me Dalai Lamën, por nga ana tjetër presidenti Obama njohu sovranitetin e Pekinit mbi
Tibetin dhe Tajvanin. Në deklaratën e përbashkët të dy presidentët nënvizuan se do
të ketë takime të tjera të dyanshme për klimën, për ekonominë duke u përqëndruar tek
tregtia dhe valuta. Presidenti amerikan Obama nënvizoi se të dy vendet janë dakord
që në takimin për klimën në Kopenhagen të merren vendime që duhen zbatuar menjëherë.
Po ashtu presidenti Hu Zhintao pranoi se dy vende si Kina dhe SHBA nuk purputhen në
të gjitha çështjet, por është e rëndësishme, tha ai, që u fol në mënyrë konstruktive
dhe me vullnet për t’i kapërcyer vështirësitë. Gjithashtu u nënshkrua marrëveshja
për ndërtimin e centralit më të madh në botë me energji diellore në Mongoli nga shoqëria
amerikane First Solar Inc. Centrali do të ketë një kapacitet prej 2 gigavat dhe do
të nisë të ndërtohet në qershorin e ardhshëm. Në konferencën që u dha për shtyp
pas takimit, gazetarëve nuk iu lejua që të bënin pyetje. Ata u detyruan t’i fikin
celularët dhe t’i dëgjonin pa fjalë deklaratat e dy presidentëve.