FAO miraton “Pesë parimet e Romës për sigurinë ushqimore”
(16.11.2009 RV)Krerët e shteteve dhe të qeverive, të mbledhur në Romë për takimin
e FAO-s mbi sigurinë ushqimore, miratuan sot deklaratën me pesë parime, që përcakton
impenjimet e luftës globale kundër urisë. Por, dokumenti nuk i përgjigjet kërkesës
së sekretarit të përgjithshëm Zhak Diuf, sipas së cilës 44 miliard dollarë duhej të
caktoheshin për zhvillimin e bujqësisë. Në deklaratë shprehet alarmi për rritjen e
numrit të të uriturve deri në 1 miliard e 200 milion dhe përsëritet impenjimi për
ta përgjysmuar atë brenda vitit 2015. Përsa u përket “Pesë parimeve të Romës për
sigurinë e qëndrueshme ushqimore”, teksi parashikon së pari, të investohet në programet
e hartuara nga vendet e interesuara; pastaj, të forcohet koordinimi në nivel rajonal
e global për të përmirësuar qeverisjen, shpërndarjen e fondeve dhe për të shmangur
paralelizmin. Parimi i tretë i deklaratës kërkon të punohet në dy binarë: ndërhyrje
të menjëhershme për personat në rrezik e programe afatmesme e afatgjatë për bujqësinë,
sigurinë ushqimore dhe zhvillimin e fshatit. Pika e katërt flet për përmirësimin e
punës dhe të koordinimit ndërmjet tri agjensive të OKB-së, që punojnë në fushën e
ushqimit dhe të bujqësisë: FAO, IFAD dhe Programi Ushqimor Botëror. Parimi i pestë
dhe i fundit ka të bëjë me burimet financiare. U kërkohet partnerëve të investojnë
vazhdimisht në bujqësi e në sigurimin e ushqimit mbi bazën e programeve dhe planeve
shumëvjeçare. Shumë liderë politikë do t’i përgjigjen thirrjes së sekretarit të
përgjithshëm të FAO-s, Zhak Diuf për të ndenjur një ditë pa ngrënë, në një lloj greve
urie për solidaritet me më të varfërit. Por si gjithmonë, impenjime të tilla të OKB-së
kanë dy faqe. Tjetra paraqet po këta politikanë në suita luksoze në qendër të Romës,
ku paguhet 750 euro nata.