Në audiencë te Papa, kryeministri i Hungarisë, Gordon Bajnai

(13.11.2009 RV)Ngjarjet e aktualitetit ndërkombëtar, posaçërisht pasojat e krizës ekonomike, ishin në qendër të vëmendjes në audiencën e Benediktit XVI me kryeministrin e Republikës hungareze, Gordon Bajnai. Gjatë bisedimeve të përzemërta – njofton një notë e Sallës vatikanase të Shtypit - u fol për thellimin e marrëdhënieve reciproke, pas Marrëveshjeve dypalëshe, nënshkruar vitet e kaluara. Veç tjerash – vijon komunikata – u prekën disa çështje që kanë të bëjnë me marrëdhëniet ndërmjet bashkësisë kishtare e asaj civile dhe u nënvizua rëndësia që ka vijimi i ecjes në rrugën e dialogut, përmes organizmave përkatëse. Pati – përfundon nota – edhe një shkëmbim opinionesh për temat e aktualitetit ndërkombëtar, ndërmjet të cilave, edhe kriza financiare, parë në dritën e Enciklikës ‘Caritas in Veritate”. U kujtua edhe presidenca hungareze në Bashkimin Evropian, në gjashtëmujorin e parë të 2011-tës.
Në përfundim të audiencës me Papën, kryeministri hungarez bisedoi me kardinalin sekretar të Shtetit, Tarçizo Bertone dhe me imzot Dominik Mambertì, sekretar për marrëdhëniet me shtetet.