Dëmet e shkaktuara nga minat kundër njeriut në Raportin 2009 të Fushatës ndërkombëtare
kundër minave
(13.11.2009 RV)Të vdesësh në fushën e betejës, megjithëse lufta ka përfunduar
prej vitesh. Ky është fati i viktimave të minave kundër njeriut, që denoncohet nga
Raporti 2009 i Fushatës ndërkombëtare kundër këtyre armëve të tmerrshme. Traktati
i Otauës, në vitin 1999, bllokoi prodhimin e tyre, sidomos të të ashtuquajturave “bomba
copëtuese”, por rreziku vjen nga ato mina, që tashmë ndodhen në terren. Të gjitha
vendet, që kanë pasur luftë në dhjetëvjeçarët e fundit, vuajnë sot këtë problem, i
cili jo vetëm shkakton viktima e gjymtime, por edhe nuk lejon shfrytëzimin e terrenit
për qëllime të tjera, duke rritur kështu tej mase koston shoqërore. Mbi këto aspekte
intervistuam presidentin e Fushatës ndërkombëtare kundër minave, italianin Xhuzepe
Skiavelo: Duhet të mbrohen shumë popullsi, që detyrohen të bashkëjetojnë
me minat dhe me armë të tjera si bombat copëtuese. Duhet të shqetësohemi për viktimat,
për asistencën e për integrimin e tyre në shoqëri. Duhet t’u japim proteza personave
që janë hedhur në erë nga minat: një fëmijë për shembull, ka nevojë për një protezë
çdo pesë muaj, pasi rritet. Në vende ku është e vështirë të gjendet edhe një fasho,
mendoni sa e vështirë është të gjendet një protezë çdo pesë muaj. Duhet të kemi parasysh
edhe se gjymtimi në këto vende shihet me turp dhe krijon gjendje mënjanimi që s’mund
as t’i imagjinojmë. Po përmend vetëm Kamboxhën, ku lufta ka përfunduar që prej 50
vjetësh, por ku akoma ka viktima të minave kundër njeriut. Një minë ka kushtuar disa
dhjetra dollarë, ndërsa bonifikimi i saj kushton mesatarisht 1000 – 1500 dollarë.