Շաբաթ, 7 Նոյեմբեր 2009-ին,
Ս. Միքայէլ նորընծայարանի պաշտպան հրեշտակապետին տօնին, Զմմառու միաբանութեան վարչութեան
հրաւէրով, տեղի ունեցաւ սարկաւագական ձեռնադրութիւնը՝ կիսարկաւագներ Գէորգ Պահէի եւ Ռաֆֆի
Պէրպէրեանի, ձեռամբ Ամենապատիւ եւ Գերերջանիկ Տ Տ Ներսէս Պետրոս ԺԹ. Տանն Կիլիկիոյ Կաթողիկէ
Հայոց Կաթողիկոս Պատրիարքին, Զմմառու վանական եկեղեցւոյ մէջ: Արարողութեան մասնակցեցան
լիբանանաբնակ հայ կաթողիկէ կղերականներ, հաւատացեալներ եւ միութիւններու ներկայացուցիչներ,
ինչպէս նաեւ ձեռնադրեալներուն հարազատներն ու բարեկամները:
Ամենապատիւ Հոգեւոր
Տէրը իր քարոզին մէջ անդրադարձաւ հրեշտակներու գոյութեան, որպէս ՜՜պաշտպան եւ օգնական
երկնային անձեր, մարդոց ծառայութեան համար՝՝: Ապա ան պարզեց սարկաւագութեան կարգի կարեւորութիւնը
Եկեղեցւոյ կեանքէն ներս առաքեալներու ժամանակէն սկսեալ մինչեւ այսօր, յիշելով որ առաջին
սարկաւագը եղաւ Ս. Ստեփանոս Նախավկան՝ Քրիստոսի եւ սուրբ Եկեղեցւոյ: Հոգեւոր Տէրը նաեւ
անդրադարձաւ մնայուն սարկաւագութեան դրութեան, Արեւելեան Եկեղեցիներուն մօտ, յայտնաբերելով
անոր զանազան պաշտօնները եւ պարտաւորութիւնները ժողովրդապետութիւններէն ներս, ծառայելու
հաւատացեալներուն եւ ճոխացնելու հովուական աշխատանքը: Հուսկ՝ Ամենապատիւ Հոգեւոր Տէրը
ընդգծեց թէ սարկաւագութեան պաշտօնը նախապատրաստութիւնն է երիցութեան կարգին, քահանայական
կեանքի կազմաւորման մէջ: Պատարագէն ետք ներկաները հաւաքուեցան սեղանի շուրջ եւ ճոխ հանդիսութեամբ
շնորհաւորեցին նոր ձեռնադրեալները :