Spitali pediatrik “Bambin’ Gesù” i Romës: fushatë për të ndihmuar fëmijët e sëmurë.
(08.11.2009 RV)T’i dhurohen katër bileta udhëtimi me avion katër fëmijëve të
huaj të sëmurë rëndë, duke iu krijuar kështu mundësinë të vinë në Itali për t’u kuruar,
që t’u shpëtohet jeta. Ky është synimi i fushatës me karakter shoqëror që ka nisur
spitali pediatrik “Krishti Fëmijë”, apo “Bambin’ Gesù” i Romës. Nisma quhet “Bashkëudhëtarë”
dhe ka si synim mbledhjen e të hollave, gjatë periudhës së Krishtlindjes edhe për
blerjen e një pajisjeje TAK të fjalës së fundit të teknikës. Bëhet fjalë për një
kartolinë Krishtlindjeje të veçantë me një surprizë brenda: një fletë e ilustruar
me udhëzimet sesi të ndërtosh një aeroplan prej letre. Kush e blen këtë lloj kartoline
ndihmon me të vërtetë në grumbullimin e fondeve për blerjen e katër fluturimeve për
katër fëmijë të sëmurë, që vuajnë nga sëmundje zemre ose onko-hematologjike, të cilët
falë këtyre biletave mund të vijnë në Itali me avion për kurime. Fëmijët që janë zgjedhur
deri tani vijnë nga Ukraina, Maqedonia, Pakistani dhe nga Iraku. Por në spital thonë
se, nëse fondet që do të grumbullohen janë më shumë, atëherë do të dhurohen më shumë
se katër bileta avioni. Është kjo një mënyrë origjinale e këtij spitali për të
festuar 140-vjetorin e themelimit. Në mikrofonin tonë flet drejtori i spitalit,
Xhuzepe Profiti: Përgjigje: Personeli i spitalit “Krishti Fëmijë” këto vite
ka organizuar udhëtimet e shumë fëmijëve. Ka bërë shumë, duke iu mundësuar këtyre
fëmijëve shtegtimin e jetës. Qëllimi është t’u sigurohet një biletë avioni atyre që
kanë probleme, që të vijnë këtu tek ne për kurime e të vazhdojnë pastaj rrugëtimin
e tyre në këtë botë. Një tjetër synim i fushatës është edhe ai i blerjes së
një pajisjeje teknike TAK të fjalës së fundit, e cila është në gjendje të paraqesë
në mënyrë tridimensionale dhe të menjëhershme organet e brendshme të trupit të njeriut,
duke i rritur në këtë mënyrë mundësitë e diagnostikimit dhe të kurimit të sëmundjeve.
Përsëri në mikrofonin tonë flet drejtori i spitalit, Xhuzepe Profiti: Përgjigje:
Tek fëmijët është shpresa. Një fëmijë i përmbledh të gjitha shpresat, të vetat, por
edhe ato të të tjerëve. Kumbarë i kësaj fushate do të jetë këngëtari dhe kompozitori
i famshëm italian. Klaudio Baljoni, që i ka kushtuar kësaj nisme një album muzikor
të vetin.