Një vit më parë bëhej president i SHBA-ve, Barak Obama
(04.11.2009 RV)Një vit pas zgjedhjeve
presidenciale në SHBA, të cilat më 4 nëntor 2008 i dhanë fitoren demokratit Barak
Obama, republikanët fitojnë zgjedhjet për guvernatorët e Virgjinies dhe të Nju Xhersit.
Majkëll Blumberg rikonfirmohet si kryetar i bashkisë së Nju Jorkut. Vota, sipas vëzhguesve,
është sinjal i pakënaqësisë së zgjedhësve ndaj politikës ekonomike të Shtëpisë së
Bardhë. Por shpresa e ngjallur me zgjedhjen e një afro-amerikani në postin e presidentit
nuk është shuar. Të dëgjojmë ambasadorin amerikan pranë Selisë së Shenjtë, Miguel
H. Diaz: I think that one year later… Mendoj se pas një
viti ajo shpresë është akoma gjallë. Janë bërë ndryshime si në nivelin e brendshëm,
ashtu edhe në atë ndërkombëtar. Mund të përmend disa: Obama frymëzoi një brez të ri
udhëheqësish; në frontin e brendshëm, mbrojti kombin nga kriza ekonomike dhe aktualisht
po punon për reformën e shëndetësisë, që të gjithë amerikanët ta kenë këtë të drejtë
themelore. Edhe në nivelin ndërkombëtar, ka shpresë për një sërë çështjesh. Obama
u impenjua për të zvogëluar arsenalin bërthamor, për të nxitur paqen. Bashkoi njerëzit,
për të nxitur dialogun, siç dëshmon fjalimi i tij në Kajro. Prandaj, si ambasador,
jam i bindur qind për qind se mesazhi i shpresës që jep presidenti është akoma gjallë
e se njerëzit me fe mund ta shndërrojnë në veprim, brenda një shoqërie demokratike
e pluraliste. Disa prej ideve të tij na ftojnë të bëjmë pikërisht këtë. Një
moment i rëndësishëm i këtij viti, qe edhe audienca e presidentit amerikan në Vatikan,
ku u takua me Papën Benedikti XVI. Sipas jush, cili është aspekti më themelor i këtij
takimi? I think the president was very… Mendoj se presidenti
u ndje shumë i nderuar e i prekur nga takimi me Benediktin XVI dhe vlerësoi shumë
mundësinë për ta takuar e për ta dëgjuar mbi çështje të ndryshme. Ky president e kjo
administratë duan të dëgjojnë këdo, të mësojnë nga të tjerët e pikërisht për këtë
arësye takimi ishte i rëndësishëm. Di se presidenti i vlerëson shumë marrëdhëniet
që kemi me Selinë e Shenjtë, si entitet sovran, si protagonist global humanitar dhe
si zë moral. Cila është e ardhmja e Barak Obamës në Shtëpinë e Bardhë, sipas
jush? My hope is that we can continue… Shpresoj të vazhdojmë
të dëgjojmë mesazhin qendror të presidentit mbi çfarë mund të bëjmë sëbashku. Nuk
është ajo që presidenti Obama mund të bëjë i vetëm, por ajo që ne si bashkësi njerëzish
mund të arrijmë sëbashku. Prandaj, shpresoj që ne ta shfrytëzojmë këtë moment si komb
e si botë e tërë, në të mirë të familjes njerëzore.