(30.10.2009 RV)“Moralisht të papranueshme
dhe të rrezikshme për gjininë njerëzore”. Kështu i komenton kryeipeshkvi Elio Sgreçia,
kryetar nderi i Akademisë Papnore për Jetën, rezultatet e kërkimit shkencor, realizuar
nga shkencëtarët e Universitetit të Stanfordit, botuar nga revista ‘Nature’, mbi bazën
e të cilave do të mund të krijohen kushtet për shndërrimin e qelizave staminale, në
qeliza embrionale njerëzore, pararendëse të qelizës vezore e të spermatozoidit. Më
shqip: është fjala për krijimin e fëmijëve pa pjesëmarrjen apo bashkëpunimin e natyrshëm
të nënës e të babait. Por një pjesë e mirë e shkencëtarëve, një mendjeje me pohimin
e Prelatit, nënvizojnë me forcë se jemi shumë larg nga mundësia e sigurimit të
qelizave staminale, që do të mund të përdoreshin për t’u krijuar, të gjithë atyre
që dëshirojnë, mundësinë për të pasur fëmijë, pavarësisht nga pengesat e natyrës shëndetësore.