(27.10.2009 RV)Papa Benedikti XVI
do të shkojë më 2 maj 2010 në Torino, me rastin e ekspozimit të Sindonës, nga 10 prill
deri më 23 maj të vitit të ardhshëm. Lajmi u dha sot me anë të një letre, nga kryeipeshkvi
i qytetit verior italian, kardinal Severino Poleto, i cili dje u prit në Vatikan nga
Ati i Shenjtë. Akti i parë i Benediktit XVI do të jetë lutja para Sindonës së Shenjtë
në katedralen e Torinos. Më pas do të kremtojë Meshën solemne për të gjithë shtegtarët
e mbledhur në sheshin e Shën Gjonit e do të thotë sëbashku me ta Lutjen e Engjëllit
të Tënzot. Pasdite, Papa do të takohet me të rinjtë e gjatë rrugës, do të ndalet në
Kotolengo për t’u takuar e për të bekuar personat që qëndrojnë në Shtëpinë e Vogël
të Provanisë Hyjnore. Në letrën e tij, kardinal Poleto shpjegon qartë se ç’pret
Kisha e Torinos nga kjo vizitë e Papës. “Dita që Ati i Shenjtë do të kalojë në Torino
– shkruan ai – do të jetë për të gjithë një rast “unik” për ta takuar, për t’u lutur
për të dhe me të, si edhe për të dëgjuar mesazhin e veçantë, që Ai do t’i sjellë Kishës
torineze e krejt shoqërisë civile në territorin tonë. Papa do t’u dhurojë një fjalë
ngushëlluese të vuajturve në përkim me temën e Ekspozimit të Sindonës “Passio Christi,
Passio hominis”. Përveç kësaj, në frymën e enciklikës së tij të fundit “Caritas
in Veritate”, do të inkurajojë e do t’u japë shpresë të gjithë atyre, që po dridhen
për një vend pune në këtë qytet, i cili është konsideruar gjithnjë “qyteti i punës
dhe i industrisë”, por që në këtë moment, ndjen më shumë se kushdo tjetër, pasojat
e një krize të gjerë e të zgjatur më shumë nga sa mendohej”. Kardinali i fton besimtarët
të luten për vizitën e Papës.