Benedikti XVI Karekinit II në 10-vjetorin e zgjedhjes si Katolikos i të gjithë armenëve:
gjithnjë e më të forta lidhjet me Kishën Katolike
(27.10.2009 RV)Një rast i gëzueshëm
për të nënvizuar përparimet në dialogun ekumenik: ky është thelbi i mesazhit të Papës
Benedikti XVI për Karekinin II, në 10-vjetorin e zgjedhjes së tij si Patrik suprem
dhe Katolikos i të gjithë armenëve. Ati i Shenjtë nënvizon punën e madhe të Karekinit
II për të përforcuar krishterimin në tokën armene. Papa kujton se pikërisht atij
i takoi të marrë në dorë fatet e Kishës Apostolike Armene, menjëherë pas rënies së
komunizmit, në një situatë aspak të lehtë. Por, nëse shihen iniciativat e sotme për
edukimin e krishterë të rinisë, për formimin e klerit, për krijimin e famullive të
reja e të shumë qendrave kishtare, për promovimin e vlerave të krishtera në jetën
shoqërore e kulturore të kombit, kuptohet puna e madhe dhe përpjekjet e jashtëzakonshme,
që kanë dhënë fryte të kënaqshme. Mesazhi përfundon me lutjen drejtuar Zotit, që katolikët
dhe armenët apostolikë të jenë gjithnjë e më të bashkuar me lidhje feje, shprese e
dashurie. Sipas një tradite të lashtë, kanë qenë Apostujt Bartolomeu dhe Tadeu,
ata që kanë çuar Ungjillin në mesin e popullit armen, i cili u kthye në fenë e krishterë
në vitin 301 për hir të Shën Gregorit Ndriçues, apo të Shën Gregorit të Armenëve.
Për këtë arsye, Kisha armene quhet edhe Kishë gregoriane. Armenët pranuan direktivat
e tri Koncileve Ekumenike, por nuk morën pjesë në Koncilin e Kaledonisë në vitin 451,
duke i dhënë kështu jetë një Kishe autoqefale. Në vitin 1996, Papa Gjon Pali II dhe
Karekini I nënshkruan një deklaratë të përbashkët për të zgjidhur shumë keqkuptime
të së kaluarës.