Papa në drekën me Etërit sinodalë: për temën e pajtimit u gjet drejtpeshimi i duhur
ndërmjet përmasës politike e asaj shpirtërore.
(25.10.2009 RV)Dje, në përfundim të Sesionit të 19-të të përgjithshëm të Sinodit
për Afrikën, Benedikti XVI drekoi me Etërit sinodalë, në Sallën e Palit VI. Gjatë
këtij takimi vëllazëror, Ati i Shenjtë vlerësoi punën e mirë që u bë në Sinodin afrikan
dhe shprehu mirënjohjen e tij: “Të dashur vëllezër e motra, tani është koha
për thënë faleminderit; mbi të gjitha, për të falënderuar Zotin që na thirri, na bashkoi,
na ndihmoi të dëgjojmë fjalën e Tij, zërin e Shpirtit Shenjt e kështu na krijoi mundësitë
për të gjetur rrugën e unitetit, në larminë e përvojave; unitetin e fesë e të bashkimit
në Zotin. Prandaj fjala Kisha-Familje e Zotit, nuk është më thjesht koncept, ide,
është përvojë e gjallë e këtyre javëve: ishim vërtetë të bashkuar, këtu, si Familje
e Hyjit”. Papa nëvizoi se për temën “pajtim, drejtësi e paqe” u gjet drejtpeshimi
i duhur, duke shmangur si rrezikun e politizimit, ashtu edhe atë të izolimit në përmasën
shpirtërore. Tema – shtoi – na vuri para një sfide aspak të lehtë: “Kjo
temë “Pajtim, drejtësi, paqe” përfshin, natyrisht, një përmasë të fuqishme politike,
ndonëse duket qartë se pajtimi, drejtësia e paqja nuk mund të arrihen, pa pastrimin
e thellë të zemrës, pa risimin e mendimit, pa një metànoia, pa një përtëritje, që
duhet të jetë pikërisht rezultat i takimit me Zotin. Por ndonëse kjo përmasë shpirtërore
është e thellë e themelore, edhe përmasa politike është shumë reale, sepse pa realizime
politike, risitë e Shpirtit nuk realizohen përgjithësisht”. Prandaj tundimi
mund të ishte të politizohej tema, të flitej më pak si barinj e më shumë si politikanë,
e kështu, me një kompetencë, që nuk është jona. Rrezik tjetër – shpjegoi Ati i
Shenjtë – ishte ai i tërheqjes në një botë pastërtisht shpirtërore, botë abstrakte
dhe e bukur, por jo realiste: “Fjalimi i bariut duhet të jetë realist, të
prekë realitetin, por duke e parë me sytë e Zotit e të Fjalës së Tij: prej këndej,
ky ndërmjetësim, nga njëra anë duhet të ketë lidhje të vërtetë me realitetin, të ketë
në qendër të vëmendjes atë që ndodh, e nga ana tjetër, të mos bjerë në rrugëzgjidhje
teknikisht politike: të flitej një fjalë konkrete, por shpirtërore, ishte problemi
i madh i Sinodit; më duket se ia dolëm mbanesh, falë ndihmës së Zotit, e kjo më shtyn
të shpreh mirënjohjen, sepse e lehtëson shumë edhe hartimin e dokumentit pas-sinodal”. Sinodi
– tha Papa – përfundon e nuk përfundon, e jo vetëm sepse punimet vijojnë me Nxitjen
pas-Sinodale: “Sinodos do të thotë të ecësh së bashku, e ne mbesim në ecjen
e përbashkët me Zotin, shkojmë përpara me Zotin për t’ia përgatitur rrugët, për ta
ndihmuar, për t’ia hapur portat e botës, që të mund të krijojë Mbretërinë e tij mes
nesh”.