З Уроцлава паведамілі, што ўпершыню Касцёл выпусціў на польскай мове кнігу, сумесна
напісаную рабінам і каталіцкім святаром. Яна прадстаўляе погляд дзвюх рэлігій на біблейскія
тэмы.
Ініцыятарам ідэі стаўся прафесар і святар з Уроцлава Маріўш Росік. Ён пераканаў пасланца
сусветнай яўрэйскай арганізацыі "Шавей Ізраэль" рабіна Рапапорта напісаць частку твора
з пункту гледжання юдаізму на высновы манатэістычнай рэлігіі. Той пагадзіўся пры ўмове,
што выдаўцы не будуць рабіць аніякіх рэдактарскіх паправак у ягоным тэксце. "Я лічу,
- зазначыў на прэзентацыі рабін, - што кніга з'яўляецца наглядным доказам плённага
супрацоўніцтва, заснаванага на талерантнасці і ўзаемапавазе. У апошія гады назіраецца
рэальнае імкненне польскіх каталіцкіх дзеячаў палепшыць атмасферу між прадстаўнікамі
дзвюх рэлігій".