Në Paris përurohet Akademia e re katolike e Francës.
(23.10.2010 RV)Me një bisedë kushtuar “Zotit, kohës e jetës”, u përurua sot
në Paris “Akademia e re katolike e Francës”, institucion laikësh e klerikësh,
të cilët i bashkon një objektiv i vetëm: ta bëjnë më të dukshëm mendimin katolik. Në
bisedën përuruese, foli edhe kryeipeshkvi i Parisit, kardinali André Vingt-Trois. Selia
e Akademisë është në Collèges des Bernardins, pikërisht atje ku, më 12 shtator 2008,
Benedikti XVI i drejtoi botës franceze të kulturës, fjalimin e tij historik. Po cilat
janë qëllimet e këtij institucioni të ri? Përgjigjet, në mikrofonin tonë, zëvendës-kryetari
i Akademisë, Atë Jean-Robert Armogathe, i kryedioqezës së Parisit: Përgjigje:
- Akademia katolike e Francës do të krijojë kushte që të dëgjohet më mirë
zëri i laikëve e i klerit, i njerëzve që kryejnë funksione të ndryshme. Rëndësi të
veçantë ka zëri i specialistëve, që pranojnë hapazi se i përkasin katolicizmit: kjo
duhet të krijojë mundësitë – të paktën shpresoj – që të jepet një mesazh më i qartë,
i cili nuk ngatërrohet me paragjykime e i pranon deklaratat e Konferencës Ipeshkvnore
të Francës, kur shprehet në emër të Kishës. Viti 2009 ishte i ngarkuar me trazira,
prandaj zëri i Kishës u zbeh nga një sërë ngjarjesh, edhe për faj të komunikimit.
Ky i fundit nuk i shikoi problemet në thellësi, por mbeti i lidhur me një mënyrë të
caktuar të përceptimit të Kishës.
Pyetje: - A propozon Akademia
ndonjë veprimtari kundër shkristianizmit të Francës? Përgjigje: -
Sot panorama ideologjike franceze është tejet e ngatërruar, asgjë s’është
më e qartë. Në rrjedhë vitesh kemi parë luftën e klasave, marksizmin... Kemi një president
republike të zgjedhur nga e djathta, me ministra nga e majta, që e denoncojnë shtetin
liberal; kemi laicitet me hoxhë formatistë, me shpenzimet e shtetit; kemi një debat
për bioetikën, për mjekësinë... e në mes gjithë këtij pështjellimi, mendimi katolik,
që duket si i varrosur nën këtë magmë... Jetojmë, pra, në një shoqëri e cila, për
shumë arsye, i ka humbur pikat e mbështetjes, duke nisur nga familja. Më duket, prandaj,
se ka ardhur koha t’i rilidhim fijet: ndjehet nevoja për një mesazh të përbashkët
e të qartë.