У Польшчы выдадзена кніга "Касьцёл і ўлада на Гомельшчыне ( 20-30 гады ХХ стагоддзя".
У тыпаграфіі навуковых выданняў у Лодзі (Польшча) у сярэдзіне верасня выйшла кніга
"Касцёл і ўлада на Гомельшчыне (20—30-я гады ХХ стагоддзя)". Зборнік архіўных дакументаў
аб адносінах каталіцкай царквы і ўлады быў падрыхтаваны выкладчыкамі-гісторыкамі Гомельскага
дзяржаўнага універсітэта імя Францыска Скарыны Віктарам Пічуковым і Андрэем Лебедзевым
у сааўтарстве з ксяндзом-дэканам Гомельскага дэканата Славамірам Ляскоўскім. Ва
ўступным слове да зборніка гаворыцца, што выданне ўключае недаступныя да гэтай пары
і таму невядомыя архіўныя матэрыялы, якія адлюстроўваюць палітыку савецкай улады ў
дачыненні да каталіцкай царквы ў Беларускай ССР у 1920—1930-я гады. Большасць з 369
дакументаў, апублікаваных у кнізе, былі створаны ў дзяржаўных арганізацыях, партыйных
органах і Саюзам ваяўнічых бязбожнікаў, які ўваходзіў у дзяржаўныя структуры. "Яны
пацвярджаюць вядомы тэзіс пра тое, што барацьба з рэлігіяй і каталіцкай царквой, якая
лічылася бастыёнам супраціўлення камуністычнаму рэжыму, была адным з найбольш важных
заданняў савецкай улады. Мэта, якую яна ставіла перад сабой, — ліквідацыя гэтай Царквы,
была дасягнута ў 1938 годзе. Тады ў Беларусі былі расстраляны і арыштаваны апошнія
святары, закрыты ўсе дзейныя да гэтага часу касцёлы", — піша ў прадмове да выдання
прафесар Каталіцкага універсітэта ў Любліне ксёндз Раман Дзванкоўскі. Аўтары ўключылі
ў зборнік дакументы 1955—1957 гадоў, што адносяцца да рэвізіі судовых працэсаў 1937—1938
гадоў, па выніках якіх вынесеныя смяротныя прысуды адразу прыводзіліся ў выкананне.
Дакументы паказваюць, што прыгаворы, заснаваныя на абвінавачанні каталіцкіх святароў
у кіраўніцтве дзейнасцю антысавецкіх польскіх арганізацый у Беларусі, не маюць якіх-небудзь
рэальных падстаў. Дакументы зборніка таксама сведчаць пра тое, як вернікі абаранялі
сваё рэлігійнае жыццё і былі асуджаны за гэта на працы ў лагерах, што пагражалі смерцю,
ці на расстрэл. "Перыяд 1920—1930-х цікавы не толькі сваёй малавывучанасцю, але
і тым, што гэта быў, відаць, самы драматычны перыяд у гісторыі рымска-каталіцкай царквы
ў Беларусі. Ні да, ні пасля касцёл не зазнаваў такіх маштабных ганенняў", — лічаць
складальнікі кнігі.