፪ ዘጽጌ 8 ጥቅምቲ 2002 ዓ.ም

ንባባት ኤፌ፡ 6፡~10 ራእ 12፡1~13 ግ.ሓ. 7፡23~30 ሉቃ 1፡39~46

መዝሙር፡ ኪነ ጥበቡ ወዕፁብ. . . . .

“ሥራሕ ጥበቡ ዘገርምን ዘደንቕን እዩ እቲ አብ ሰማየ ሰማያት ዘሎ አባና ምሕረቱ ገለጸ”። አብ ዓለም ዝርከብ ፍጡር ኩሉ ክብሪ አምላኽ ይገልጽ። መዝሙር ናይ ሎሚ አምላኽ ብስነ ጽባቐ ፍጡራት ዕሞቕ ፍቕሩ ከምዝገለጸ ይገልጸልና። ናይ ፍጡራት መልክዕ ነቲ ፈጠሪኦም ዝሃቦም ህያብ ይምስክሩ። ኩሉ ተዋሂቡ እዩ። ፍጡራት ካብ ኮና ተዋሂብና ኢና። ውህበት አምላኽ ነቲ ዝተዋህቦ ዝለዓለ ህያብ እዩ። ክከም ዓቕምና ነናትና ህያብ አሎና። ነዚ ወሃቢ አምላኽ ክነምስግኖ ግቡእ እዩ።

፪ይ ሰንበት ዘጽጌ ህያብ አምላኽ ብማርያም ክነስተንትን ይሕግዘና። ማርያም ብስራት መድሓኒን ናይ ኤልሳቤጥ ዘመዳ ምጽናስን ብመልአኽ ምስተነግራ ተቐላጢፋ ናብ እንዳ ዘካርያስ ክትሕግዝ ኸይዳ። ምኽንያቱ ኤልሳበጥ ብጽሕቲ ነፍሰጾር ስለ ዝነበረት። ማርያም ክትጉዓዝ እንከላ አብ ከርሳ ኢየሱስ ሕጻን ነሩ። ከም ታቦተ ኪዳን አብ ከርሳ ጸራቶ ትጉዓዝ ነራ። ነቲ ሰማያት ክጾርዎ ዘይክእሉ ንሳ አብ ከርሳ ጾሮቶ ይብለና ውድሴ ማርያም። አብ መገዲ ብዙሓት ዝጓነፍዋ ዝነበሩ አብ ከርሳ ዝነበረ እንተ ዝፈልጡ እንታይ ኮን ምበሉ ብርግጽ ንአአን ንወዳን ፍሉይ ክብሪ ሂቦም መገልገልዋ። ዕብየት ወዳ ንአአ እውን መዕበያ።

ማርያም ጉዕዝአ ቀጺላ አብ እንዳ ዘካርያስ ምስ በጽሐት ኤልሳቤጥ መንፈስ ቅዱስ ወሪድዋ ክትንበ ጀመረት፥ አብ ከርሳ ዝነበረ ዮሓንስ ምስ ማርያም ምስ ተራኸበ ብተሕጓስ ክሰራሰር ጀመረ እዚ ኸአ ዮሓንስ ናይ ኢየሱስ ጎይታ መን ምዃኑ ጌና አብ ከርሲ አዲኡ እንከሎ ስለ ዘላለየ እዩ። አበው ነዚ ከስተንትኑ ከለዉ ዮሓንስ ሽኡ ተጠሚቝ ይብሉ።

ንሉቃስ ወንጌላውን ንብዙሓት ተርጎምቲ ቅዱስ መጽሓፍን ሰውነት ደቂ ሰብ ናይ አምላኽ ናይ ድሕነት ሥራሕ መጋበሪ ከምዝኾነ ይገልጹ። እዚ እዩ ትስብእቲ ክርስቶስ ዝነግረና። ማርያም አብ ከርሳ ትስብእትን አምላኽነትን ብሓደ ጸራቶ። ሉቃስ ብንጹር ፍልልይ ማርያምን ኤልሳቤጥን፥ ኢየሱስን ዮውሓንስን ይነግረና። ኢየሱስ መሲሕ ወዲ አምላኽ ብሞቱን ትንሣኤኡን ንዓለም ጨሪሹ ዝቕይር እዩ። አብ ኢየሱስ ውህደት አምላኽነትን ትስብእትን ብግሉጽ አብ ምድሓን ደቂ ሰብ ተራእዩ። እዚ ኹሉ ተግባራዊ ክኸውን ቀንዲ መጋበሪ ዝኾነ እቲ ካብ ማርያም ብዝተወስደ ሥጋ እዩ።

ማርያም አብ ገዛ ዘካርያስ ክትከይድ ዘገደዳ ነገራት እንተ ርኤና፥

ነቲ ብመልአኽ ዝተነግራ ብምስማዕ ብእምነት ከይዳ፥ አብ አገልግሎት ወፊራ ንኤልሳቤጥ ነፍሰጾር ዘላ ዘመዳ አብ እርጋና አምላኽ ምሕረት ዝገበረላ ክትሕግዛ ከይዳ። ነዚ መሰረት ገርና ሓጋዚት ጽጉማት እናበልና ንጽውዓ።

መገሻ እዩ ነሩ ካብ ዓዳ ናብ ካልእ ከይዳ ካብ ገዝአ ክተግልግል ወጺአ ምናልባት ንሳ እትአልዮም ገዲፋ ቀዳምነት ንኤልሳቤጥ ሂባ። አብ ሕይወትና አምላኽ ክንሕግዝ ክነገልግል ምልክት ይህበና ነቲ ምልክት አንቢብና ክንክእል ናታትና ግደ እዩ።

አብ አምላኽ ዝቐረበ ክልአኽ ግድን እዩ ነብያት ልኡኻት እምላኽ እዮም፥ ሓዋርያት ተላኢኾም፥ አምላኽ ክልእኽ ይደሊ አብ ኢሳያስ 6፡8 “ሽዑ እግዚአቢሔር ንመን ክልእኽ፥ መንከ ክኸደልና እዩ፥ ኪብል ሰማዕኩ አነ እውን እነኹ ልአኸኒ በልኩ” ይብል፥ ንሰባት ክረድእ፥ መልእኽቱ፥ ከመሓላልፍ፥ ዝኾነ ክብል ክገብር ምስ ደለየ ሰባት ክልእኽ ድለቱ እዩ። ማርያም ኩሉ ግዜ ልእኽቲ ድለት አምላኽ እያ። ናይ ሎሚ ልኡኻት መልእኽቲ አምላኽ አነን ንስኻትኩምን እና። ከምቲ ጳውሎስ አብ መልእኽትታቱ ዝብሎ ንሕና ልኡኻት አምላኽ ኢና። ክትልአኽ መጀምርያ ክትአምን ይግባእ ዘይአምን ክልአኽ አይክአልን እዩ። ልኡኻት አምላኽዶ አሎና?

አብ ቤት ዘካርይስ ምስ አተወት ንኤልሳቤጥ ሰላም ምስ በለታ እቲ ሕፃን አብ ከርሳ ተሰራሰረ ንኤልሳቤጥ ከአ መንፈስ ቅዱስ መልአ እሞ ዓው ኢላ “ንስኺ ካብ አንስቲ ዝተባረኽኪ ኢኺ እቲ ኻባኺ ዝውለድ ሕጻን እውን ዝተባረኸ እዩ . . . . እቲ ካብ እግዚአብሔር ዝተነግረኪ ቃል ከም ዝፍጸም ስለ ዝአመንኪ ብፅዕቲ ኢኺ በለታ”። አብዚ ዓሚቕ ትምህርቲ አሎ፥

መንፈስ ቅዱስ ምስ ኢየሱስን ማርያምን ይመጽእ፥ ሽዑ ናይ ሓጎስ ምስጋና መዝሙር ክንዝምር የኽእለና።

ንአምላኽ አብ ልብና ብፍሉይ ሥጋኡን ደሙን ክንቅበል ከሎና ቡራኬ ይወርደና ሽዑ ሓጎስ ደስታን ሰላምን ይመልአና። ምስ ክርስቶስ ምርኻብ እቲ ዝለዓለ ጸጋ እዩ፥ ኤልሳቤጥ ነዚ እያ አስተማቒራ።

ነቲ ብአምላኽ ዝውሃበና ብእምነት ክንቅበሎ ከሎና አብ መዓርግ ብፅዕና ንሓልፍ። ገለ እዋን ክርድአና ከቢድ እዩ ግን ኩሉ አብ ኢድ አምላኽ እንተ ሓደግናዮ ሽዑ አብ ኢድ አምላኽ አሎና።

ኤልሳቤጥ አብ ማርያም አምላኽ ከመይ ገሩ ድለቱ ከምዝፈጸመን ከመይ ገራ ንሳ ከም ዝመለሰትን ርእያ አመስጊናታ፥ ንማርያም ብእሽታአ ክነመስግና ይግባእ።

ኤልሳቤጥ ናይ ማርያምን ኢየሱስን ዕብየት ተረዲእዋ፥ ናይ ማርያም ክብሪ ካብቲ ጸራቶ ዘላ ጉይታ ከምዝመጸ አነጺራ ተዛሪባ። ከምቲ ዳዊት ንጉስ ታቦት እግዚአቢሔር ከመይ ገሩ ናባይ ኪመጽእ (2ነገስት 6፡9) ዝበሎ ኤልሳቤጥ ከምኡ እናበለት ተገሪማ። አብዚ ንማርያም ብፅዕቲ ትብላ፥ ብፅዕንአ ኸአ ነቲ ብጎይታ ዝተባህላ ስለ ዝአመነት እዩ፥ አብዚ እምብአር እምነት እምበር ካልእ ናይ ጽድቂ ስራሕ ብምግባራ አይኮነን። ንሳ ከም እትፀንስ ወዲ ከም እትወልድ አሚና። ነዚ ዝፀነሰቶ ሒዛ እያ ናብ እንዳ ዘካርያስ ከይዳ። ሎሚ አብ መንጎና ክትብምጽኦ ትኽእል እያ።

ፍሉይ ትምህርቲ ማርያም ንነፍስ ወከፍና አብዚ ናይ ሎሚ ስንበት፡

ንጽጉማት፥ ንኹሎም ሓገዝ ዘድልዮም ክንሕግዝ ድለት አምላኽ እዩ፥ ንሰብ ክንሕግዞ ከሎና ማለት ብንዋታዊ ሞራላዊ አብ ጸግሙ ክንካፈል ከሎና ምስኡ ውህደት ንፈጥር ካብቲ ዘልኦ ክትንስእ ጸግዒ ንኾኖ። ንዝሓመመ፥ ንዝተጸገመ፥ ንዝሓዘነ፥ ምሕጋዝ ማርያም አብነትና እያ።

ንዝተዋህበና ጸጋ አምላኽ አብ ክብሪ አምላኽ ክነውዕሎ ይግባእ፥ አምላኽ ጸግኡ ዝህብ ንአምላኽን ንኸማና ዘበለ ሰብ ክነገልግለ ምእንቲ እዩ። ነፍስወከፍና ነናትና ጸጋ ተዋሂቡና አሎ ክነፍርዮ ናታትና ግደ እዩ። ማርያም አደ አምላኽ ከንሳ ንገልግሎት ተበጊሳ ብዝያዳ ክትሕግዝ ወፊራ፥ ጸጋ ንሰናይ ተግባር የውፍረና። ጸጋ ዝጎደሎ ሰብ ጽቡቕ ክገብር ይጽግሞ ሽዑ ንመንገዲ አምላኽ ሓዲጉ ንጸጋም ይወፍር።

ቤትና ቤት አምላኽ ክንገብሮ ኤልሳቤጥን ዘካርያስን አብነትና እዮም ቤቶም ቤት አምላኽ ነሩ ከምኡ ስለ ዝኾነ ማርያም ምስ ወዳ በጺሓቶም ወላ እኳ አብ ከርሳ እንተ ነበረ። አምላኽ አብ ልብና ክሓድር ልብና ክንከፍተሉ ሽዑ ከም ማርያምን ኤልሳቤጥን ናይ ሓጎስ መዝሙር ክንዝምር። ሕይወትና ንአምላኽ ክፉት ክንገብሮ።

አባ ንጉሠ ፍሥሓ