Takim ndërkombëtar në Kapitol kushtuar paqes e drejtësisë në Afrikë
(19.10.2009 RV)“Afrika: ç’ partneship për pajtimin, drejtësinë e paqen”: me
këtë titull u zhvillua, sot paradite, në Kapitol të Romës, një takim ndërkombëtar,
organizuar nga Komuna , në bashkëpunim me Sekretarinë e Sinodit të Ipeshkjvijve,Radio Vatikanin dhe Bashkësinë e Shën Egjidit. Takimi u mbajt në kuadrin e Asamblesë
II Sinodale për Afrikën, që vijon në Vatikan kushtuar temave të pajtimit, të drejtësisë
e të paqes. Ndërmjet pjesëmarrësve, edhe shumë Etër sinodalë. Afrika e Roma; më
mirë të themi, Afrika e mbarë bota, që në një farë mënyre, përfaqësohej nga Kryeqyteti
italian. Nga ky parakusht u nis takimi, për të ripohuar se ndërmjet dy vendeve gjeografike
ekziston një lidhje e fortë, vepruese, që ndikon, më pas, në mbarë globin. Theksi
u vu kryesisht mbi nxitjen e një zhvillimi, që nuk është ai i tregut a i fitimit,
por që vë në plan të parë promovimin e gjithanshëm të njeriut dhe i krijon Kontinentit
afrikan mundësitë t’i konkretizojë aftësitë e veta, duke i dhënë fund monopolit të
sipërmarrjeve shumëkombëshe. Por, të dëgjojmë Kryebashkijakun e Romës, Gjani Alemano: “Nuk
ka asnjë projekt zhvillimi, asnjë hedhje themelesh me karakter teknik, që mund të
ketë sukses, në se nuk themelohet mbi bazën e vlerave e mbi njohjen e vlerës universale
të personit njerëzor”.