Konferenca për fëmijët me SIDA: në plan të parë impenjimi i rregulltarëve për të ndihmuar
fëmijët e sëmurë.
(17.10.2009 RV)Përfundoi në Romë
në Universitetin Papnor të Shën Kryqit, Konferenca triditore për fëmijët me SIDA
dhe tuberkuloz. Në veçanti, u fol për parandalimin dhe transmetimin e Sidës nga nëna
tek fëmija dhe për gjendjen e kushtet e fëmijëve të prekur nga kjo sëmundje dhe nga
tuberkulozi në vendet në zhvillim. Konferenca është promovuar nga Karitasi Ndërkombëtar
dhe Ambasada Amerikane pranë Selisë Shenjte. Në takim morën pjesë shumë rregulltarë
të impenjuar prej vitesh në luftën kundër Sidës. Një impenjim që nuk i kursen energjitë,
thotë Atë Dejvid Glendei, sekretar i Bashkimit të Eprorëve të Përgjithshëm, i cili
foli edhe në konferencë. Pikërisht për këtë arsye organi që përfaqëson rregulltarët
dhe rregulltaret e të gjithë botës ka themeluar “Komisionin e Shëndetit”. Në mikrofonin
tonë flet Atë Paolo Guarize, i urdhërit kamilian, kryetar i këtij komisioni. Cili
është objektivi më urgjent?
Përgjigje: Të sensibilizojmë veçanërisht ndërmarrjet
farmaceutike dhe qeveritë t’i ulin çmimet si ato të barnave, të analizave,
në mënyrë që mjekimi të jetë më i lehtë për fëmijët e sëmurë.
Pyetje: A
ka shpresa në këtë drejtim?
Përgjigje: Duhet të shtohen donacionet, mbi
të gjitha duhet bërë mirë shpërndarja e këtyre fondeve, veçanërisht kur vijnë nga
qeveritë. Por për fat të keq nuk është e thënë që t’i marrin personat e interesuar.
Këto fonde humbasin rrugës. Kjo është diçka shumë e rëndësishme për t’u diskutuar.
Pyetje:
Rregulltarët, rregulltaret janë personat që u gjenden pranë konkretisht të sëmurëve,
si fëmijëve ashtu edhe nënave...
Përgjigje: Po, e nganjëherë rregulltarët
dhe rregulltaret nuk kanë as kohë të merren këtë, sepse janë shumë të shqetësuar nga
situata financiare. Me fjalë të tjera, nëse qeveritë apo ndërmarrjet farmaceutike
do të jepnin më shumë të holla, atëherë ne rregulltarët dhe rregulltaret do të kishim
më shumë kohë për t’iu përkushtuar problemeve të tjera, jo ekonomike, por gjithnjë
të lidhura me sëmundjet e Sidës dhe të TBC, tuberkulozit. Por shpeshherë shqetësimi
ynë më i madh është si të sigurojmë fonde.
Pyetje: Ju përmendet aspektin
njerëzor, atë që nevojitet atje ku mjekësia nuk jep rezultate....
Përgjigje:
Patjetër. Do të thosha se impenjimi ynë kryesisht është një impenjim baritor, shpirtëror
dhe fetar. Por këtij pastaj i shtohet në planin praktik, edhe kura mjekësore. Ajo
çka duam ne është një gjë e dyfishtë, shoqërimi i kurave me aspektin human.