Kardinali Anxhelo Komastri boton një libër të ri. Titullohet “Do të quhesh Pjetër”.
(17.10.2009 RV)Me rastin e Vitit
Meshtarak, shpallur nga Benedikti XVI, kardinali Anxhelo Komastri, kryeprift i Bazilikës
së Shën Pjetrit e mëkëmbës i Shenjtërisë së Tij për Qytetin e Vatikanit, paraqiti
në Auditorin e Kuries së Etërve Agostinianë, librin e tij më të ri, titulluar ‘Do
të quhesh Pjetër. Autobiografi e papës së parë”. Është autobiografi artistike e supozuar
e Shën Pjetrit. Ngjarjet e librit ndjekin gjurmët e Apostullit rrugëve të Palestinës,
deri në Romë, ku e vulosi me gjak fenë e tij, duke hapur faqen e parë të historisë
së ipeshkvijve të Qytetit të Amshuar “Faqe tronditëse” – shkruan në hyrjen e librit
sekretari i Shtetit të Vatikanit, kardinali Tarçizio Bertone - të cilat e nxisin lexuesin
t’i përgjigjet thirrjes së Jezusit, që sfidoi krenarinë e të gjitha kohëve, duke
u impenjuar ta ndërtojë Kishën e tij mbi shpatullat e brishta të një njeriu, të cilin
e bëri të fortë, si shkëmb”. Këtij peshkatari të përvujtë e dyshimtar, që më pas
u bë peshkatar njerëzish, Jezusi i besoi detyrën të vinte gurin e parë të Kishës së
Tij, atë të themelit. Po sa e vështirë është sot të bëhesh peshkatar njerëzish? Përgjigjen
e jep libri i ri i kardinalit Komastri, që pret të shfletohet edhe nga lexuesi shqiptar….