(13.10.2009 RV)Marrë nga Gazeta Shqiptare, 12. 10. 2009 Autoritetet
zyrtare në Indi e kanë cilësuar të pamundur realizimin e kërkesës së kryeministrit
shqiptar, Sali Berisha, për kthimin në Shqipëri të eshtrave të Nënë Terezës. Gazeta
indiane "Calcutta Telegraph" shkruan në numrin e saj të djeshëm, duke iu referuar
burimeve zyrtare në Nju Delhi, se "Nënë Tereza ishte një shtetase indiane dhe do të
jetë shumë komplekse dhe e vështirë të pranohet kërkesa shqiptare për kthimin e eshtrave
në Shqipëri". Më tej citohet edhe zëdhënësi i misionit humanitar që drejtoi Nënë Tereza,
duke deklaruar se nuk mund të japë një koment specifik në lidhje me këtë çështje.
Ai thotë se deri tani nuk kanë marrë ndonjë kërkesë të tillë, por shtoi se në rast
se vjen, duhet të vendosë misioni humanitar nëse varri i Nënë Terezës të lëvizë. Gazeta
indiane shkruan më tej se Shqipëria dhe Maqedonia janë dy shtete që pretendojnë ende
për nacionalitetin e Nënë Terezës. Berisha Tirana zyrtare po synon kthimin
në atdhe të eshtrave të Nënë Terezës. Qeveria Berisha ka kërkuar nga India që eshtrat
e saj të kthehen në atdhe në gushtin e ardhshëm, kohë që përkon dhe me 100-vjetorin
e lindjes së saj. "Negociatat me qeverinë e Indisë do të intensifikohen gjatë këtij
viti", - tha kryeministri Berisha në një konferencë të posaçme shtypi të mbajtur dy
ditë më parë. Shefi i ekzekutivit bëri gjithashtu të ditur se për këtë qëllim është
ngritur një komision shtetëror, i cili do të merret me procedurat zyrtare të kthimit
të eshtrave në atdhe të Nënë Terezës, si edhe të shumë personaliteteve më të mëdha,
më të shquara e me kontributin më madhor në historinë e kombit shqiptar. "Qeveria
vendos të kthejë në Shqipëri eshtrat e Mbretit Ahmet Zogu. Qeveria shqiptare merr
këtë vendim, duke njohur Ahmet Zogun kryeministër, president dhe më vonë, Mbret i
shqiptarëve, si arkitektin e shtetit modern shqiptar, si njërin prej personaliteteve
më të mëdha, më të shquara, me kontribut më madhor në historinë e kombit shqiptar",
theksoi Berisha në daljen para mediave. Të njëjtën gjë kreu i qeverisë premtoi edhe
për eshtrat e Fan Nolit dhe Mit'hat Frashërit. "Ju keni të drejtë, nuk janë sjellë
në vend eshtrat e Nolit. Por ka edhe një problem, si primar i Kishës Ortodokse shqiptare
në Shtetet e Bashkuara të Amerikës, Noli frymëzoi dhe frymëzon diasporën shqiptare
në atdhetarinë e saj, në dashurinë e saj të pakufishme ndaj Shqipërisë. Ndaj dhe Kisha
shqiptare e Bostonit e ka Nolin realisht si shenjtorin e saj të pashpallur. Por qeveria
shqiptare do të nisë përpjekjet për të kthyer në Shqipëri burrin e madh të Kombit,
Mit'hat Frashërin dhe personalitete të tjera", theksoi kreu i qeverise. Tedi
Blushi