Përfundoi java e parë e Sinodit II për Afrikën, që vijon punimet në Vatikan.
(11.10.2009 RV)Në Vatikan përfunduan punimet e javës së parë të Sinodit II
të ipeshkvijve për Afrikën. Gjatë diskutimeve të Etërve Sinodalë u prekën temat më
të rëndësishme, që kanë të bëjnë me Kishën në Kontinent, por edhe argumente me rëndësi
të dorës së parë nga jeta e shoqërisë afrikane. Të premten e kaluar në qendër
të punimeve ishte situata tejet e rëndë në Darfur, zonë e Sudanit perëndimor. Pjesëmarrësit
ndoqën me interes diskutimin e Rudolf Adadës, ish- kryetar i Bashkimit afrikan të
misioneve të paqes për Darfurin. E për paqen u fol edhe të enjten: Etërit Sinodalë
bënë thirrje për paqe në Republikën Demokratike të Kongos. Sesioni VI i përgjithshëm
i Sinodit të Ipeshkvijve për Afrikën i së enjtes së kaluar, u përqendrua kryesisht
tek temat e pajtimit, të drejtësisë e të paqes. U votua edhe për zgjedhjen e Komisionit
për mesazhin përfundimtar të Sinodit. Këto tema ishin në qendër të vëmendjes edhe
të mërkurën, kur një delegacion i Etërve Sinodalë u prit në Kampidolio nga
kryetari i bashkisë i kryeqytetit, Xhani Alemano, i cili u uroi mirëseardhjen në
Romë. Më pas biseda u përqendrua tek bashkëpunimi për zhvillim, rrugët që duhen përshkuar
për sigurimin e paqes, emigracionin dhe kontributin e Romës në takimin e rangut të
lartë të FAO-s, nëntorin e ardhshëm. U fol edhe për manifestimin që do të organizohet
nga Komuna pikërisht për Afrikën, më 19 tetor 2009. Gjithnjë të mërkurën pasdite,
Etërit Sinodalë reflektuan për ‘teorinë e gjinisë’, që kërcënon familjen; për rolin
e fëmijëve, si ndërtues të paqes dhe për rëndësinë e komunikimit të Kishës në ndihmë
të pajtimit. Në këtë drejtim ka rëndësi të dorës së parë edhe përmasa politike e paqes.
U theksua në mënyrë të posaçme edhe nevoja e pranisë së Kishës, atje ku vendosen fatet
e popujve. Një përmasë tjetër e rëndësishme e rritjes së Kishës në Kontinentin afrikan,
është edhe numri i burrave e i grave afrikane, që kryejnë drejtpërdrejt misionin ‘ad
gentes’ – në gjirin e popullit. E kisha e Afrikës është e thirrur t’i nxisë kombet
e të edukojë ndërgjegjet, siç u shpreh kryeipeshkvi i Antananarivos, në Madagaskar,
imzot Odon Marì Arsen Razanakolona. E martja e kaluar pati në qendër të vëmend
jes diskutimin e Patrikut Ortodoks etiop, Abuna Paulus, pas të cilit Etërit Sinodalë
ndoqën përshëndetjen e Benediktit XVI.