Thirrje e imzot Miliores në OKB: bashkësia ndërkombëtare të impenjohet për një botë
të çliruar nga armët e nga droga.
(09.10.2009 RV)Edhe në një vit krize ekonomike, si 2008-ta, shpenzimet ushtarake
u rritën 4%: këtë denoncoi kryeipeshkvi Çelestino Miliore i cili, duke folur dje
në Asamblenë e 64-t të përgjithshme të Kombeve të Bashkuara, e nxiti bashkësinë ndërkombëtare
t’i përgjigjet shpresave të mbarë popujve për një botë, më në fund, pa armë. Prelati
kujtoi se njerëzimi ka më tepër nevojë për më shumë shkollim, më shumë ushqim, më
shumë shëndet, më shumë ujë, më shumë siguri, në një botë ku të ketë gjithnjë më pak
armë. Po dje, duke marrë fjalën edhe në Komitetin e Tretë të Asamblesë së përgjithme
të OKB-së mbi kontrollin ndërkombëtar të drogës, vëzhguesi i Selisë së Shenjtë nënvizoi
me forcë se droga vijon të jetë pengesë serioze për zhvillimin ekonomik, politik e
shoqëror të individëve e të kombeve. Kujtoi, kështu, se Selia e Shenjtë kërkon nga
bashkësia ndërkombëtare të mbrojë shëndetin dhe dinjitetin e të gjithëve, duke parandaluar
përdorimin e rrezikshëm të drogave e duke lehtësuar vuajtjet e njerëzve të droguar.