Беларускі Эпіскапат запросіць Папу Бэнэдыкта 16 ў Беларусь
Менска-Магілёўскі мітрапаліт арцыбіскуп Тадэвуш Кандрусевіч заявіў, што падчас бліжэйшага
візыту беларускіх біскупаў ad limina Apostolorum у Ватыкане, Эпіскапат ягонай краіны
накіруе да Папы Рымскага Бэнэдыкта XVI афіцыйнае запрашэньне ў Беларусь. Ерарх
Каталіцкага касьцёла ў Беларусі нагадаў, што Бэнэдыкта XVI у краіну ўжо двойчы запрашаў
прэзыдэнт Аляксандар Лукашэнка. У мінулым годзе запрашэньне Папу Рымскаму перадаў
дзяржсакратар Апостальскай сталіцы кардынал Тарчызіо Бэртонэ, а ў красавіку таксама
прэзыдэнт падчас свайго візыту ў Ватыкан. Цяпер галаву Каталіцкага касьцёла запросіць
беларускі Эпіскапат, - сказаў арцыбіскуп Тадэвуш Кандрусевіч. : Ёсьць некалькі
нагодаў паломніцтва, напрыклад, 300-годзьдзе менскай катэдры, 100-годзьдзе касьцёла
сьвятых Сымона й Алены (Чырвонага касьцёла) – гэта найважнейшыя юбілеі. Прэзыдэнт
запрасіў. Усе мы чакаем. Людзі дапытваюцца калі, але я не магу назваць даты. Папа
Рымскі сказаў, што калі „Бог адчыніць дзьверы, тады ён увойдзе”! Мы молімся, каб згаданыя
дзьверы былі адкрытыя як найхутчэй. - сказаў Менска-Магілёўскі мітрапаліт,
арцыбіскуп Тадэвуш Кандрусевіч. Візыт беларускіх біскупаў ad limina Apostolorum
у Ватыкане адбудзецца 10-14 сьнежня. Арцыбіскуп Кандрусевіч дадаў, што калі б дайшло
да паломніцтва, то ў Беларусі магла б адбыцца сустрэча Бэнэдыкта XVІ з патрыярхам
Масквы й Усяе Русі Кірылам.