Thirrje për paqen në Kongo, nga Sinodi për Afrikën.
(08.10.2009 RV)Sot paradite, në Vatikan, u mbajt Sesioni VI i përgjithshëm
i Sinodit të ipeshkvijve për Afrikën. Në qendër të vëmendjes, temat e pajtimit, të
drejtësisë e të paqes. Pas votimit për zgjedhjen e anëtarëve të Komisionit për mesazhin,
vijuan diskutimet me tema të ndryshme. Ndër më të rëndësishmet, “teoria e gjinisë”
veprimtaria e Komisionit ‘Drejtësi e Paqe’ dhe rreziqet, që burojnë nga grupet neo-pentekostale.
Kujtojmë se ‘Teoria e gjinisë’, që e konsideron ndryshimin ndërmjet burrit e gruas
si fakt më shumë shoqëror, sesa bilogjik dhe e shikon homoseksualitetin si zgjedhje
kulturalisht të pranueshme, ka depërtuar aty-këtu edhe në mjediset e Kishës. Në
përfundim të Sesionit, nga salla u ngrit një thirrje e fuqishme për paqe në Republikën
Demokratike të Kongos, ku këto ditë vijon ushtrimi i dhunës kundër të krishterëve. U
fol edhe për shembullin e madh të shenjtorëve, të cilët u quajtën ‘thesari i vërtetë
i Kishës vendase”. U theksua se shembulli i tyre duhet vënë në themel të ungjillëzimit,
të inkulturimit e të pajtimit.