Masakër pranë Ambasadës së Indisë në Kabul, 17 të vdekur.
(08.10.2009 RV)Sot paradite një atentat i ri tronditi thellë Kabulin, në Afganistan,
ku një atentator vetëvrasës u hodh në erë në bordin e një autoje pranë ambasadës indiane.
Rezultati ishte tragjik: 17 të vdekur e 83 të plagosur. Sipas njoftimit të Ministrisë
së jashtme afgane në televizionin vendas, për shkak të plasjes së fortë, u dëmtuan
rëndë ndërtesa e përfaqësisë diplomatike të Nju Delhit si dhe shumë dyqane e shtëpi
të zonës. Viktimat, ndërmjet të cilave edhe gra e fëmijë, janë kryesisht civilë
e punonjës të sigurimit. Kujtojmë se ambasada indiane në Kabul është fare pranë ministrisë
afgane të mbrojtjes. Presidenti afgan, Hamid Karzai e quajti atentatin ‘akt terrorist
kundër njerëzve të pafajshëm”. Ndërsa talebanët, në faqen e tyre të internetit, konfirmuan
autorësinë e sulmit vrasës, duke nënvizuar se objektivi ishte ambasada indiane. Është
e dyta herë që një autobombë shpërthen pranë ambasadës indiane të kryeqytetit afgan. Herën
e parë plasja shkaktoi vdekjen e më se pesëdhjetë vetëve, ndërmjet të cilëve, edhe
disa diplomatë indianë, ndërsa u plagosën më se 140 persona.