(08.10.2009 RV)Shkrimtarja gjermane me origjinë rumune, Herta Myler, është
fituese e Çmimit Nobel 2009 për letërsinë. Njoftimin e dha sot Akademia Suedeze, e
cila e quajti 56 vjeçaren, shkrimtare që pikturon, me koncentrimin e poezisë e objektivitetin
e prozës, njerëzit e përjashtuar nga radhët e shoqërisë. Ky është edhe motivimi i
Çmimit. E lindur më 17 gusht 1953 në Nitchidorf të Rumanisë në një familje fshtarësh
të pakicës gjermane, shkrimtarja përshkroi me mjeshtri të rrallë poetike jetën e vështirë
nën regjimin komunist të Çausheskut. Në vitin 1979, pas pushimit nga puna për shkak
të mospranimit për të bashkëpunuar me sigurimin e shtetit, u arratis nga Rumania,
së bashku me të shoqin. Që atëherë vijon, pa rezultat, përpjekjet për të shfletuar
dosjen personale në arkivat e sigurimit, ndonëse deklaron se nuk pret ndonjë gjë të
madhe nga ky shfletim, sepse ata që kujdesen për arkivat, kanë pasur gjithë kohën
e dëshiruar për t’i zbrazur e për t’i tjetërsuar dosjet. Libri i saj i parë, shkruar
gjermanisht, u shtyp në Rumani, në një variant të cenzuruar, në vitin 1982. Fituesja
e Çmimit Nobel 2009 për letërsinë jeton në Berlin. Aktualisht tejet e njohur në Gjermani
e në të gjithë Evropën, që nga viti 1995 është anëtare e Akademisë gjermane të Letërsisë.
Para se të merrte Çmimin e madh, shoqëruar me vlerën 1. 4 milionë dollarë, shkrimtarja
ka fituar edhe çmime e vlerësime të tjera të larta, ndërmjet të cilave, Çmimin ‘Klaist’
(1994); ‘Jozef Breibah” (2003) dhe ‘Konrad Adenauer” (2004).