Në Lutjen e Engjëllit të Tënzot, solidariteti i Papës për viktimat e fatkeqësive natyrore
në Azi, në Paqësor dhe në Itali. Thirrje për paqen në Guinea
(05.10.2009 RV)Hapja e punimeve sinodale për Afrikën ishte një nga argumentet,
që trajtoi Papa Benedikti XVI edhe në Lutjen e djeshme të Engjëllit të Tënzot. Por
ajo që e mallëngjeu turmën e besimtarëve, të mbledhur poshtë dritares së Atit të Shenjtë,
në Sheshin e Shën Pjetrit, qenë fjalët ngushëlluese të Papës për viktimat e të mbijetuarit
e fatkeqësive natyrore, që kanë goditur kohët e fundit zona të tëra në Azi, si edhe
tragjedia e rrëshqitjes së dheut dhe e përmbytjeve në Mesinë të Italisë: “Cunami
i Ishujve Samoa e Tonga; tajfuni i Filipineve, që më pas goditi edhe Vietnamin, Laosin
e Kamboxhien; tërmeti shkatërrimtar në Indonezi. Këto katastrofa kanë shkaktuar humbje
të mëdha në jetë njerëzore, shumë të zhdukur e të pastrehë, si edhe dëme të jashtëzakonshme
materiale. Përveç kësaj, mendoj edhe për ata që vuajnë nga shkaku i rrëshqitjes së
dheut e nga përmbytjet në Siçili, sidomos në zonën e Mesinës. I ftoj të gjithë të
luten me mua për viktimat dhe të dashurit e tyre. Jam shpirtërisht afër të pastrehëve
e të gjithë personave të sprovuar, duke iu përgjëruar Zotit që t’ua lehtësojë dhimbjen.
Bëj thirrje që të mos u mungojë këtyre vëllezërve dhe motrave solidariteti ynë dhe
mbështetja e bashkësisë ndërkombëtare”. Ati i Shenjtë foli edhe për Sinodin
afrikan, që po zhvillon punimet në Vatikan. Është një kontinent me rreth 1 miliard
vetë, me një pasuri të jashtëzakonshme njerëzore, që ka numrin më të madh të lindjeve
në botë, por që mbetet më i varfëri e më i braktisuri. E duke folur për impenjimin
e etërve sinodalë, theksoi: “Është e rëndësishme të nënvizohet se nuk kemi
të bëjmë me një konferencë studimi, as me një asamble pragmatike. Dëgjojmë relacione
e ndërhyrje në sallë, konfrontohemi në grupe, por të gjithë e dimë mirë se protagonistët
nuk jemi ne: është Zoti, është Shpirti i tij i Shenjtë, që udhëheq Kishën. Gjëja më
e rëndësishme për të gjithë është të dëgjojmë: të dëgjojmë njëri-tjetrin, e të gjithë
bashkë të dëgjojmë atë që Zoti dëshiron të na thotë. Prandaj, Sinodi zhvillohet në
një atmosferë feje e lutjeje, me bindje të thellë ndaj Fjalës së Zotit”. E
nga Afrika, pas lutjes mariane, Ati i Shenjtë kujtoi edhe konfliktet, që vënë në rrezik
paqen dhe sigurinë e kontinentit të zi: “Gjatë këtyre ditëve ndoqa me shqetësim
episodet e rënda të dhunës, që prekën thellë popullsinë e Guinesë. U shpreh ngushëllimet
e mia familjeve të viktimave, i ftoj palët në dialog, në pajtim e jam i sigurtë se
do të bëhen të gjitha përpjekjet për të arritur në një zgjidhje të drejtë e të barabartë”. Të
shtunën e ardhshme, sëbashku me etërit sinodalë dhe me të rinjtë universitarë të Romës,
Papa do të thotë një Rruzare të veçantë “me Afrikën e për Afrikën”. Përmes satelitit,
do të lidhen me Sallën Pali VI në Vatikan, studentët e disa vendeve afrikane.