Benedikti XVI hapi në Shën Pjetër Sinodin II të Ipeshkvijve për Afrikën, zemra shpirtërore
e një bote në krizë
(05.10.2009 RV)Afrika është një mushkëri e madhe shpirtërore për njerëzimin
në krizë feje e shprese. Kështu u shpreh dje Benedikti XVI, gjatë Meshës që përuroi
hapjen e Sinodit II të Ipeshkvijve për Afrikën, me temë: “Kisha në Afrikë në shërbim
të pajtimit, drejtësisë e paqes. Ju jeni kripa e tokës…Ju jeni drita e botës”. Gjatë
homelisë, Papa vuri në dukje rrezikun e materializmit praktik dhe të fondamentalizmit
fetar, që mund të rrënjoset në kontinentin e zi, dhe ripohoi parimin e mbrojtjes së
jetës e të familjes së themeluar mbi martesën. Tepër shpesh Afrika shihet si burim
lëndësh të para, por ajo është e pasur me të tjera thesare, nënvizoi Ati i Shenjtë: “Fjala
e Zotit na bën të shohim një pasuri tjetër: atë shpirtërore e kulturore, për të cilën
njerëzimi ka nevojë shumë më tepër se për lëndët e para… Nga kjo pikpamje, Afrika
përfaqëson një “mushkëri” të jashtëzakonshme shpirtërore për njerëzimin, që është
në krizë feje e shprese”. Por, kjo mushkëri mund të sëmuret, vazhdoi Papa,
sidomos me një patologji, shumë të përhapur në botën perëndimore, si “materializmi
praktik i kombinuar me mendimin relativist e nihilist”. “Nuk ka diskutim që
e ashtuquajtura “botë e parë” ka eksportuar dhe po eksporton plehra helmuese shpirtërore,
të cilat dëmtojnë popullsitë e kontinenteve të tjera, në veçanti, ato afrikane. Në
këtë kuptim, kolonializmi, që ka marrë fund në planin politik, nuk ka përfunduar kurrë
krejtësisht”. Një virus i dytë që mund të infektojë Afrikën, shtoi Benedikti
XVI, është fondamentalizmi fetar, i përzierë me interesa politike dhe ekonomike: “Grupe
që u përkasin feve të ndryshme po përhapen në kontinentin afrikan; e bëjnë këtë në
emër të Zotit, por sipas logjikës së kundërt me atë hyjnore, duke mësuar e praktikuar
jo dashurinë e respektin për lirinë, por intolerancën dhe dhunën”. Më pas,
Benedikti XVI u ndal në temën e ndërlikuar të martesës në kontekstin afrikan kishtar
e shoqëror, duke kujtuar se martesa, ashtu si paraqitet në Bibël, nuk ekziston jashtë
marrëdhënieve me Zotin: “Jeta bashkëshortore ndërmjet burrit e gruas, e pra
edhe e familjes që rrjedh prej saj, kuptohet vetëm në bashkim me Hyjnin e, në dritën
e Besëlidhjes së Re, bëhet ikonë e Dashurisë trinitare e sakrament i bashkimit të
Krishtit me Kishën. Në masën me të cilën ruan e zhvillon fenë e vet, Afrika mund të
gjejë pasuri të pamata në favor të familjes së themeluar mbi martesën”. Këtu,
Papa përmendi gjendjen e fëmijëve, të cilët përbëjnë një pjesë të madhe të popullsisë
së vuajtur afrikane. Në Afrikë, ashtu si në pjesën tjetër të botës, nënvizoi Benedikti
XVI, Kisha shfaq përkujdesjen e saj amnore ndaj më të vegjëlve, që kur nuk kanë lindur
akoma: “Kisha nuk sheh në ta kryesisht njerëz që kanë nevojë për asistencë,
e aq më tepër që kanë nevojë për mëshirë, apo mund të manipulohen, por sheh në ta
persona me të gjitha të drejtat, të cilët, me mënyrën e tyre, tregojnë rrugën kryesore
për të hyrë në mbretërinë e Zotit, atë të lëshimit pa kushte në duart e dashurisë
së Tij”. Duke pasur parasysh Sinodin e parë për Afrikën, që është mbajtur
në vitin 1994, Papa kujtoi se akoma sot mbetet aktuale detyra e ungjillëzimit të kontinentit.
Kemi të bëjmë me një “ungjillëzim të ri”, i cili duhet të marrë parasysh ndryshimet
shoqërore të epokës dhe globalizimin: “Me veprën e saj të ungjillëzimit e promovimit
njerëzor, Kisha mund të japë një kontribut të madh për shoqërinë afrikane, e cila
në shumë vende, vuan varfërinë, padrejtësitë, dhunën e luftrat. Thirrja e Kishës,
bashkësi njerëzish të pajtuar me Zotin e ndërmjet tyre, është të jetë profeci e tharm
pajtimi ndërmjet grupeve të ndryshme etnike, gjuhësore e fetare, brenda kombeve të
veçanta e në të gjithë kontinentin”. Pajtimi është themeli mbi të cilin duhet
ndërtuar paqja, përfundoi Ati i Shenjtë, kusht i domosdoshëm për përparimin e vërtetë
të njerëzve në shoqëri. Për t’u bërë “dritë e botës e kripë e tokës”, të gjithë, rregulltarë
e laikë, duhet të shenjtërojnë jetën, që Kisha në Afrikë të jetë gjithnjë një familje
dishepujsh të vërtetë të Krishtit, ku ndryshimi ndërmjet etnive të bëhet arësye e
nxitje për pasurimin e ndërsjelltë njerëzor e shpirtëror”.