Mesha e Papës Benedikti XVI në përurimin e Sinodit kushtuar Afrikës
(04.10.2009 RV)U përurua sot me
një meshë të kremtuar nga Papa Benedikti XVI, Sinodi i veçantë i Ipeshkvijve për Afrikën.
Punimet do të fillojnë nesër në Vatikan. Në prag të tyre, ipeshkvijtë afrikanë nënvizojnë
përpjekjet e Kishës për paqen dhe pajtimin në kontinent. Ungjillëzimi, paqja e
pajtimi janë në qendër të dokumentit të paraqitjes së Instrumentum Laboris të Asamblesë
II të Veçantë për Afrikën të Sinodit të Ipeshkvijve, publikuar nga Simpoziumi i Konferencave
Ipeshkvnore të Afrikës e të Madagaskarit (SECAM). Një shqyrtim i shpejtë i përpjekjeve
të SECAM-it gjatë 40 vjetëve të ekzistencës së tij – shkruhet në dokument – nxjerr
në pah se që nga fillimi, në korrik 1969, ipeshkvijtë e kontinentit u impenjuan për
të mbështetur Papën Pali VI në misionin e tij të paqes në Afrikë, me publikimin e
dy deklaratave për paqen e zhvillimin në përfundim të Asamblesë përuruese. Më
vonë, ipeshkvijtë afrikanë bënë një deklaratë mbi pajtimin e pendesën në Afrikë, në
përfundim të Asamblesë së gjashtë të Përgjithshme të Sinodit të Ipeshkvijve, që u
zhvillua në vitin 1983 në Romë, si përgjigje e ndarjeve dhe e tensionit në kontinent.
Gjatë viteve, ipeshkvijtë kanë zhvilluar iniciativa të ndryshme për promovimin njerëzor
në Afrikën e sotme, për drejtësinë e paqen, për mënyrën e zgjidhjes së konflikteve
dhe të ungjillëzimit në kontinentin e zi. Hapat e fundit fillojnë në tetor 2001,
me publikimin e një letre baritore të SECAM-it mbi temën e asamblesë së një viti më
parë: “Krishti paqja jonë. Si Kisha – Familje e Zotit mund të jetë sakrament Pajtimi
në Afrikë”. Letra, e cila është aktuale edhe sot, paraqet problemet, konfliktet dhe
luftrat në Afrikë, vendos ballë për ballë paqen që ofron bota me atë të ofruar nga
Krishti, duke u bërë thirrje popujve afrikanë të përqafojnë rrugën e paqes, të pajtimit
e të dashurisë. Të frytshme për Kishën e kontinentit kanë qenë reflektimet mbi Këshillimin
Apostolik “Ecclesia in Africa” dhe diskutimi i propozimeve për Asamblenë II të Sinodit,
që do të fillojë nesër, në mënyrë që ajo të sjellë fryte të bollshme për Afrikën.