Simpoziumi “Siguri dhe Shpresë. Sinodi i ipeshkvijve për Afrikën.”
(01.10.2009 RV)T’i shërbejmë me
besim dhe shpresë Sinodit duke përfshirë institucionet, shoqërinë civile dhe kishtare
dhe të favorizojmë potencialet shpirtërore dhe njerëzore të Afrikës për progresin
e saj shoqëror. Janë këto objektivat e Simpoziumit, organizuar nga Lëvizja Shalom
Onlus me titullin “Siguri dhe shpresë: Sinodi i ipeshkvijve për Afrikën” që u zhvillua
sot pasdite në Romë pranë Universitetit Gregorian. Po, cila është domethënia e këtij
simpoziumi që i drejtohet jo vetëm meshtarëve por edhe laikëve e studentëve? Në
mikrofonin tonë flet Dom Stiv Gaston Bobongod, koordinator i grupit afrikan i Lëvizjes
Shalom:
Përgjigje: Është ky një moment reflektimi përpara hapjes
së Sinodit të dytë për Afrikën. Duhet të kujtojmë se Ati i Shenjtë kur erdhi në Afrikë
pati uruar që Sinodi afrikan të përgatitej jo vetëm nga ipeshkvijtë por edhe nga të
gjithë popujt afrikanë, nga të gjitha dioçezat dhe shoqatat. Ja pra, ne deshëm që
të ndihmojmë sipas dëshirës së Atit të Shenjtë.
Pyetje: Një popull,
një kontinent Afrika i cili me vlerat e veta po bëhet protagonist aktiv në rrugëtimin
drejt sinodit të ardhshëm afrikan. Cilat janë karakteristikat e Kishës në Afrikë?
Të ndjekim tani Dom Bris Ibombo sekretar i simpoziumit:
Përgjigje: Një
Kishë e gëzueshme, e gjallë dhe plot jetë. E impenjuar në nivel baritor, në nivel
ungjillëzues, por edhe në nivel të dashurisë. Ndër vlerat e shumta mbi të gjitha dallojmë
vëllazërimin, sepse jeta nuk i përket një individi, por të gjithë bashkësisë. Njeriu
nuk jeton për vetëveten por për të gjithë bashkësinë. Kemi pastaj vlerën e solidaritetit,
të gëzimit etj. Tani për tani në Afrikë ka shumë që vuajnë nga uria por që të gjithë
janë të qetë shpirtërisht, të gëzuar, sepse kanë besim tek këto vlera të jetës dhe
kështu që e gëzojnë jetën edhe pa patur asgjë.
Pyetje: Pajtimi, drejtësia
dhe paqja do të jenë temat e sinodit të ardhshëm. Cilat janë sfidat e ardhshme? Të
dëgjojmë se si shprehet Imzot Andrea Kristiani, themeluesi i Lëvizjes Shalom Onlus:
Përgjigje:
Po qe se ne do të arrinim të investonim për mbrojtjen e paqës atë çka investojmë
për armë, sikur të investonim për traktorë, farëra të zgjedhura, për arsimim dhe kulturë,
për shkolla, spitale, për qendra mikpritjeje për fëmijët, për gratë, mendoj se paqja
do të kishte një qëndrueshmëri më të madhe.