Dhuna kundër të krishterëve në bisedimet ndërmjet Papës dhe presidentit të Pakistanit
(01.10.2009 RV)Papa Benedikti XVI
priti sot paradite në Pallatin Apostolik të Kastelgandolfos, presidentin e Republikës
islamike të Pakistanit, Asif Ali Zardari, i cili më vonë u takua edhe me Sekretarin
e Shtetit të Vatikanit, kardinalin Tarçizio Bertone dhe me Sekretarin për Marrëdhëniet
me shtetet, mons. Dominik Mambertì. “Bisedimet e përzemërta – lexohet në notën
e Sallës së Shtypit të Selisë së Shenjtë – bënë të mundur të flitej për situatën aktuale
në Pakistan, duke iu referuar në veçanti luftës kundër terrorizmit dhe impenjimit
për të formuar një shoqëri më tolerante dhe harmonike në të gjitha përmasat e saj. U
fol edhe për kontributin pozitiv të Kishës Katolike në jetën shoqërore të vendit,
përmes veprimtarive edukative, shëndetësore e asistenciale. Duke përmendur ngjarjet
e fundit të dhunshme kundër bashkësisë së krishterë në disa zona si edhe elementet
që kanë favorizuar këto incidente të rënda, u nënvizua nevoja për të kapërcyer çdo
formë diskriminimi, që bazohet në përkatësinë fetare, me qëllim nxitjen e respektimit
të të drejtave të të gjithë qytetarëve”.