Ditë historike në Brno. Papa: Krishti është e vetmja shpresë e sigurtë. Pa Zotin,
njerëzimi shkon drejt rrugëve absurde.
(27.09.2009 RV)Të krishterët duhet
t’i kujtojnë Evropës rrënjët e saj të krishtera. Kjo mund të ishte fraza përmbledhëse
e ditës së dytë të shtegtimit apostolik të Benediktit XVI në Republikën Çeke. Tri,
çastet kryesore: Mesha e Lutja e Engjëllit të Tënzot në Brno, takimi ekumenik në Kryeipeshkvinë
e Pragës dhe takimi me botën akademike në Kështjellën e kryeqytetit çek. Meshë
e ndjerë në Brno, ku morën pjesë rreth 150 mijë besimtarë, të ardhur edhe nga Sllovakia,
Polonia, Gjermania, Hungaria e Austria. Takimi më i madh fetar në historinë e Republikës
Çeke. Është hera e parë që Papa vjen në këtë qytet, i dyti për nga numri në Çeki.
Në fillim, një meshtar u shpjegoi njerëzve dëshirën e Papës, që të ndiqej në heshtje,
pa duartrokitje e valëvitje flamujsh. Dëshira u prit shumë pozitivisht nga besimtarët,
të cilët akoma i kujtojnë duartrokitjet e detyruara të regjimit komunist. Pranë eleterit
qe vendosur Zoja e Drunjtë me Fëmijën në krah nga Shenjtërorja e Turanit, e ashtuquajtura
Zoja e Gjembave, ngushëllim për ata që provojnë dhimbje e vështirësi. Papa tha se
Jezusi ka ardhur për t’u shpallur lirinë e gëzimin të gjithë të mjerëve e të varfërve.
Krishti është e vetmja shpresë e sigurtë e besnike, për të cilën ka nevojë bota, Evropa
e njerëzimi mbarë: “Përvoja e historisë tregon se në ç’absurditete arrin njeriu,
kur e përjashton Zotin nga horizonti i vendimeve e veprimeve të veta, e se si nuk
është e lehtë të ndërtohet një shoqëri e frymëzuar nga vlerat e së mirës, e drejtësisë
e të vëllazërimit, pasi megjithëse njeriu është i lirë, liria e tij mbetet e brishtë.
Atëherë, liria duhet rifituar për të mirën dhe kërkimi jo i lehtë i “rendit të drejtë
për gjërat njerëzore” është detyrë që u takon të gjitha brezave”. Shpresa
e vërtetë – vazhdoi Ati i Shenjtë – realizohet me vdekjen e ngjalljen e Jezu Krishtit,
por kultura e sotme e ka lënë fenë thjesht në planin privat, ose të mbinatyrshëm,
ndërsa në jetën konkrete publike ia le vendin përparimit shkencor dhe ekonomik. Por,
pavarësisht se zhvillimi teknik e përmirësimet shoqërore janë të nevojshme – theksoi
Papa – ato nuk mjaftojnë për të garantuar mirëqënien morale të shoqërisë: “Njeriu
ka nevojë të çlirohet nga pesha e gjërave materiale, por edhe më shumë, duhet të shpëtohet
nga të këqiat që i brengosin shpirtin. E kush mund ta shpëtojë nëse jo Zoti, që është
dashuri dhe e ka zbuluar fytyrën e vet si Atë i gjithëpushtetshëm e i mëshirshëm në
Jezu Krishtin? Shpresa jonë më e fortë është pra Krishti: në Të, Zoti na ka dashur
deri në skaj e na ka dhënë jetën me plotësi, atë jetë që çdo person, nganjëherë edhe
pa vetëdije, e dëshiron me gjithë shpirt”. Papa kujtoi se shumë kanë vuajtur
për t’i qëndruar besnikë Ungjillit e nuk e kanë humbur shpresën; të tjerë janë flijuar
për t’i dhënë dinjitet njeriut e lirinë popujve. Të gjithë e kanë gjetur te Krishti
forcën për të shikuar drejt një lloji të ri njerëzimi: “Edhe në shoqërinë e
sotme, ku shumë forma varfërie lindin nga izolimi, nga padashuria, nga refuzimi i
Hyjit e nga mbyllja tragjike në vetvete e njeriut, që mendon se vetja i mjafton, ose
mendon se është vetëm diçka pa rëndësi e kalimtare; në këtë botën tonë që tjetërsohet
‘kur u beson vetëm projekteve njerëzore’ (cfr. Caritas in Veritate, 53), vetëm Krishti
mund të jetë shpresa jonë e sigurtë. Ky është lajmi që ne të krishterët duhet ta përhapim
çdo ditë, me dëshminë tonë”. Në Lutjen e Engjëllit të Tënzot, Benedikti XVI
përshëndeti shtegtarët e ardhur nga vende të ndryshme përreth Republikës Çeke, shumë
prej të cilëve ishin lutur gjithë natën, para fillimit të Meshës. Të gjithë i ftoi
të mos qëndrojnë indiferentë para atyre që kërkojnë të vërtetën, dashurinë dhe jetën
e vërtetë.