Перш,чым накіравацца да прэзідэнта ў Градчаны, Бенедыкт 16 пайшоў ціха маліцца да цудатворнай статуі Дзіцяткі Езуса ў касцёле Святой Марыі Пераможніцы. Ён наклаў на галаву маленькай драўлянай, пакрытай воскам, славутай статуі спецыяльна зробленую ў Рыме залатую карону."Прыгажосць дзяцінства хай будзе ахаваная!"

Тут, ля каханага Езулаткі - так пяшчотна называюць пражане цудатворны аб'ёмны вобраз, на Папу чакалі дзеткі з бацькамі. "Будзем маліцца ў імя сем'яў , асабліва тых, што ў цяжкасці, хваробе і болю, у крызісе падзелу, свараў і нявернасці,"- усклікнуў Папа перад цудатворнаю фігуркай."Усе ведаем, як важная сямейная стабільнасць і шлюбная згода для сапраўднага прагрэсу чалавецтва і цэлай яго будучыні!" Сёння з нагоды свята першага ў гісторыі візіту Папы Рымскага да цудатворнай статуэткі Езулаткі, яго апранулі ў чырвоны святочны строй. Звычайна ягоная вопратка - зялёная. А ўсяго гэтай статуі маленькага Езуса, якая, дарэчы, першапачаткова мае сваю васкавую вопратку, былі за стагоддзі падораныя багата аздобленыя каменнямі і залатым снурам пад 70 вышыванак. Для іх пры капліцы адчынены музей, дзе ёсць падарункі ад імператрыцы Марыі Габсбурскай, каралёў, прэзідэнтаў. Кармелітане босыя, якія пачалі апекавацца Царквою яшчэ перад 30-гадовай вайны з пратэстантамі ў 17 стагоддзі, пашырылі культ Праскага Дзіцяткі Езуса па многіх краінах. Нават па мілітве да копій цудадзейнай фігуркі Праскага Езулаткі таксама адбываюцца вялікія цуды. Асабліва цяпер шануюць яе і трымаюць копіі ў краінах Лацінскай Амерыкі, Славакіі, Польшчы, Германіі, Аўстрыі, Філіпінах, В'етнаме і Кітаю. А самая фігурка была ў 16 стагоддзі прывезена з Іспаніі кантэсай Максімільянай Марыяй Манріко дэ Ларэ, калі пайшла замуж за чэскага графа. У 1587 годзе яна падарыла фігурку сваёй дачцы ад 2 шлюбу Паліксене на вяселле. Яна ўвайшла ў гісторыю як Паліксена з Лабковіц, якая статую перадала на захаванне братам-кармелітам, купіла непадалёк замак і сабрала у ім так званую Галярэю 6-ці стагоддзяў, а сама пастаянна прыходзіла маліцца да свайго Езулаткі, які пачаў цудатворыць.
Напрыканцы сённяшняга знаходжання блізка фігуркі Дзіцяткі Езуса Папа Бенедыкт 16, які перад сваім выбарам на Пятровы Пасад неаднаразова прыбываў у Прагу на малітву, звярнуў увагу цэлага хрысціянства на сучасную сітуацыю пагрожанага дзяцінства. "Колькі сёння дзетак, якія не маюць любові, павагі, прытулку!, - усклікнуў з болем Папа. -Колькі з іх стаюцца ахвярамі насілля і рознага роду выкарыстання з боку жудасных асоб! Неабходна ахоўваць павагу да непаўналетніх людзей і надаваць ім патрэбны клопат: дзеці ёсць надзеяй чалавецтва!"- моцна падкрэсліў Папа. Напрыканцы ён сардэчна пагутарыў з прысутнымі дзеткамі і іхнымі сем'ямі і папрасіў малых быць сябрукамі і сведкамі святога Дзіцяткі Езуса.