Me imzot Ravazin vazhdojmë bisedën mbi sfidat e botës së globalizuar. Ndër këto janë
argumentet fetare që trajtohen nga libra e filma, me teprime, shtrembërime të ngjarjeve
historike.
(24.9.2009 RV)Me imzot Xhanfranko
Ravazin, kryetar i Këshillit Papnor të Kulturës vazhdojmë bisedën mbi sfidat e botës
së globalizuar. Ndër këto sfida janë edhe argumentet fetare që trajtohen nga libra
e filma, të cilët në tëshumën e rasteve kanë teprime, shtrembërime apo ikja
nga të vërtetat fetare apo faktet e ngjarjet historike. Para një prodhim-botimi mjaft
të madh e të larmishëm që trajtojnë tema fetare në mënyrë të lirë, shpesh herë njerëzit
e madje edhe besimtarët mbesin të çorientuar, kjo edhe për faktin e mungesës së formimit
të përshtatshëm që duhet të ketë çdo njeri e aq më tepër një besimtarë në fushën e
besimit që ka.
Imzot Ravazi pra, sot shikojmë se botohen libra e prodhohen
filma, që trajtojnë tema fetare, kishtare, duke u përpjekur të ngjallin kureshtjen
e njerëzve, por në mënyrën e tyre. Çfarë qëndrimi duhet të mbajnë besimtarët ndaj
këtyre ‘prodhimeve kulturore’?
"Së pari duhet thënë se në këtë tip filmash
ka shumë teprime, që i bëjnë të pabesueshëm. Kur përdoren një mori efektesh, kur
kalohet kufiri në skenat e krimeve, kur teprohet edhe në përdorimin e ngjyrave, atëherë
publiku nis t’i shikojë këta filma si lojë, jo si mesazh. E këtë mund ta vëresh menjëherë,
duke dëgjuar ç’thuhet kur njerëzit dalin nga sallat e kinemasë. Duhet pasur parasysh
edhe një fakt tjetër, për fat të keq, shumë i trishtuar. Është padija, që e mbulon
si me një mantel, jo vetëm shoqërinë laike bashkëkohore, por edhe vetë botën e besimtarëve,
e cila është në të njëjtin nivel, tepër të ulët, përsa i përket mendimit kritik,
njohjes së të vërtetave të fesë, historisë së krishterimit. E kjo çështje ka të bëjë
kryesisht me Kishën. Dikur ndiqej rruga e katekizmit, rruga e komunikimit, përmes
metodave të ndryshme. Tani del përsëri në pah ajo, që e përsëritëm disa herë: tema
e gjuhës. Kisha nuk ka arritur të ketë një komunikim me domethënie të thellë, me
vlera, që i nguliten njeriut në mendje e në zemër. Duhet, prandaj, t’i përgjigjemi
padijes e ta mbushim zbrazësinë me disa forma të reja, me disa thjeshtëzime të padiskutueshme.
Për shembull, librave me prirje të theksuara ateiste, që janë tejet të rëndomtë,
nuk është e arsyeshme t’u japim përgjigje të larta, filozofike. Duhen dhënë përgjigje
të shpejta, nganjëherë edhe në formë replike. E kjo duhet bërë edhe për filmat, që
na propozohen kohët e fundit".