Lutuni, punoni, vuani për Kishën: Papa në audiencën e përgjithshme citon Shën Anselmin,
që mbrojti lirinë e Kishës nga ndërhyrja e politikës
(23.09.2009 RV)Lutuni, punoni e
vuani për Kishën: kjo është ftesa që u drejtoi besimtarëve sot paradite Papa Benedikti
XVI, gjatë audiencës së përgjithshme në Sallën Pali VI në Vatikan. Katekizmin e sotëm,
Ati i Shenjtë e përqëndroi në figurën e shën Anselmit, i cili ka sivjet 900-vjetorin
e kalimit në amshim. Fjalët e tij “nuk mundohem të kuptoj për të besuar, por
besoj për të kuptuar”, theksoi Papa, janë shumë të dobishme edhe sot. Benedikti XVI
përshkoi jetën e shenjtit të lindur në Aosta të Italisë, murg benedektin, prior e
më pas abat i Bec në Francë, e akoma kryeipeshkëv i Kanterburit në Angli, si mbrojtësin
e pashembullt të lirisë dhe pavarësisë së Kishës e të pushtetit shpirtëror nga pushteti
politik i kësaj bote. Pikërisht për këtë arësye, kujtoi Papa Racinger, shën Anselmi
u internua e më vonë u ripranua në selinë ipeshkvnore kur mbreti Henriku I, në vitin
1106, hoqi dorë nga e drejta për të emëruar përgjegjësit e Kishës, për të marrë taksa
dhe për të konfiskuar pasuritë e saj. Themelues i teologjisë skolastike, i quajtur
“Doktor i madh”, shën Anselmi qe i vetëdijshëm se kërkimi i Zotit nuk përfundon kurrë.
Papa theksoi: “Ai pohon qartë se kush dëshiron të bëjë teologji nuk mund të
mbështetet vetëm në inteligjencën e vet, por duhet të kultivojë njëkohësisht një përvojë
të thellë feje”. Shën Anselmi na mëson se aktiviteti i teologut zhvillohet
në tri etapa: “Feja, dhuratë falas e Zotit për t’u pranuar me përvuajtëri;
përvoja, që është mishërimi i Fjalës së Hyjit në jetën e përditshme; e më pas njohja
e vërtetë, që nuk është kurrë fryt i arësyetimeve të thata, por intuitë kundruese”. Dashuria
për të vërtetën dhe etja e vazhdueshme për Zotin e shën Anselmit, nënvizoi Benedikti
XVI, të jenë për çdo të krishterë shtytje që të kërkojë pa u lodhur bashkimin gjithnjë
e më intim me Krishtin, Rruga, e Vërteta dhe Jeta: “Zelli plot guxim që e dallonte
veprimin e tij baritor, e që nganjëherë i sillte keqkuptime, probleme e deri internimin,
t’i inkurajojë Barinjtë e Kishës, personat e shuguruar dhe të gjithë besimtarët ta
duan Kishën e Krishtit, të luten, të punojnë e të vuajnë për të, pa e braktisur e
pa e tradhtuar”. Në përshëndetjet e fundit, Papa kujtoi viktimat e aksidentit
të minierës polake Vujek-Slask dhe i kërkoi Shën Pios nga Pietrelçina, festën e të
cilit kremtojmë sot, të inkurajojë të rinjtë që ta shohin të ardhmen si shërbim bujar
për Zotin e të afërmin: “Shembulli i këtij shenjti – vazhdoi të fliste Papa
për Shën Pion – kaq popullor, të jetë për meshtarët, në këtë Vit Meshtarak, e për
të gjithë të krishterët, ftesë për t’i besuar gjithnjë mirësisë së Zotit, duke u afruar
e duke kremtuar me besim Sakramentin e Pajtimit, për të cilin Shenjti i Garganos,
ndarës i palodhur i mëshirës hyjnore, qe mbarështues besnik”.