Kryeministri i Shqipërisë Berisha niset për Amerikë, për të marrë pjesë në Asamblenë
e Përgjithshme të OKB-së
(21.9.2009 RV)Kryeministri i Shqipërisë Berisha u nis sot për një vizitë në
Shtetet e Bashkuara të Amerikës, ku do të marrë pjesë në Sesionin e 64 të Asamblesë
së Përgjithëshme të Kombeve të Bashkuara. Zyra e shtypit e Kryeministrisë
bëri të ditur se gjatë kësaj vizite Kryeministri Berisha, i cili do të shoqërohet
edhe nga Zëvendëskryeministri dhe Ministri i Punëve të Jashtme, Ilir Meta, do të ketë
një axhendë të ngjeshur me takime bilaterale me liderë botërore dhe personalitete
të rëndësishme botërorë. Gjithashtu, Kryeministri Berisha do të bëjë një përshëndetje
në Millenium Challenge Corporation, si dhe do të jetë i ftuar të marrë pjesë në Samitin
mbi Ndryshimet Klimaterike. Kryeministri do të jetë referuesi kryesor në Samitin "Global
Creative Leadership", në panelin mbi edukimin dhe impaktin e teknologjisë digjitale
në edukim. Kryeministri Berisha dhe zonja Berisha do të jenë në mesin e shumë
liderëve të tjerë të botës, kryetarë të delegacioneve pjesëmarrëse në Sesionin e 64
të Asamblesë së Përgjithëshme të Kombeve të Bashkuara, të cilët do të priten në një
mbrëmje gala nga Presidenti i Shteteve të Bashkuara të Amerikës, zoti Barak Obama,
në Metropolitan Museum of Arts. Në debatin e Sesionit të 64 të Asamblesë
së Përgjithëshme të Kombeve të Bashkuara Kryeministri Berisha do të mbajë një fjalim
për të pranishmit në sesion. Gjatë vizitës së tij në SHBA, Kryeministri Berisha
do të zhvillojë takime edhe me komunitetin e shqiptarëve, që jetojnë dhe punojnë në
Shtetet e Bashkuara të Amerikës dhe që japin një kontribut të çmuar në jetën dhe politikën
e vendit. nga ATSH-ja