Італьянскія СМІ нагадалі генуэскаму суддзю пра Віку Мароз
Старшыня Генуэскага суду па справах непаўналетніх Адрыяна Санса — супраць дэпартацыі
дзяцей-нелегалаў назад у свае краіны. У сваёй заяве для Міністэрства ўнутраных спраў
ён падкрэсьліў, што дзеці-нелегалы ўсё ж павінны заставацца і ўтрымлівацца ў Італіі,
бо іхнія правы “вышэйшыя, чым закон”. “Правы дзіцяці выходзяць за рамкі любога
закону і нават Канстытуцыяў паасобных дзяржаў”, — падкрэсьліў доктар права, — “і мы
маем законнае права не выконваць незаконныя загады…” Тым часам італьянскае выданьне
Il Giornale нагадвае доктару Санса, што тры гады таму ён займаў дыямэтральна супрацьлеглую
пазыцыю, калі ў генуэскім судзе разглядалася справа наконт утойваньня італьянскай
сям’ёй Джуста-Барначын беларускай сіраты Вікі Мароз. Тады генуэскі судзьдзя адстойваў
беларускую законнасьць. Менавіта зь ягонай санкцыі італьянскія карабінэры зрабілі
начны рэйд у манастыр, дзе ўтойвалася дзяўчынка, і даставілі яе гвалтоўна ў аэрапорт,
ня даўшы нават разьвітацца зь людзьмі, якіх яна называла “мамай” і “татам”. Нягледзячы
на сьлёзы дзяўчынкі і яе любоў да італьянскай сям’і, яе даставілі назад у Беларусь,
дзе яна, па сутнасьці, нікому не была патрэбная. Як піша выданьне, заявы можна
рабіць самыя эфэктныя, аднак і тры гады таму, і сёньня ў Італіі багата судзьдзяў,
якія ўсяляк асуджаюць тых, хто “выступае супраць законнага права не выконваць незаконны
загад”.