Папская Рада да спраў Адзінства Хрысьціян пацьвердзіла візыт высокага прадстаўніка
расійскага праваслаў”я ў Ватыкан. Арцыбіскуп Валакаломскі Ілярыён, які кіруе ў Маскоўскім
Патрыярхаце Аддзяленьнем Вонкавых Царкоўных Адносінаў, будзе ў Рыме ў днях 15-20 верасьня.
Як паінфармавана ў камунікаце ватыканскае ўстанове да спраў экумэнізму, “візыт будзе
сьведчаньнем працягласьці добрых двухбаковых адносін, якія пацьвярджаюць мінулыя
гады”. Арцыбіскуп Ілярыён сустрэнецца з Папам Бэнэдыктам 16-м, кардыналам Тарчыцыё
Бэртонэ, з прадстаўнікамі Папскае Рады да Спраў Адзінства Хрысьціян, з Кангрэгацыі
да спраў Усходніх Цэркваў ды Папскае Рады да спраў Культуры. Гэта першы візыт новага
кіраўніка Аддзяленьня Вонкавых Царкоўных Адносін Маскоўскага Патрыярхату ў Рым. Прадказваючы
яго некалькі дзён таму назад арцыбіскуп Ілярыён паясьніў, што мэтаю візыту мае быць
абмеркаваньне праблемаў, якія спалучаныя з дыялогам паміж абедзьвума Цэрквамі. Зазначыў
пры гэтым, што двухбаковыя адносіны палепшыліся за часоў цяпершняга Рымскага Папы.
Дагэтуль за дыялог з Ватыканам у Маскоўскім Патрыярхаце адказным быў мітрапаліт Кірыл-
цяперашні кіраўнік рускага праваслаў”я. Як падккрэсьлена ў ватыканскім камунікаце,
цяперашні візыт “пацьвердзіць прыязныя адносіны паміж абедзьвума Цэрквамі, якія прытрымліваюцца
цьвёрдых асноў узаемнага зразуменьня і пашаны, ў пэрспэктыве больш шчыльнага супрацоўніцтва
ў карысьць прысутнасьці Царквы і Касьцёла ў жыцьці народаў Эўропы і сьвету”.