Në tetor në Vatikan mbahet Sinodi i Ipeshkvijve për Afrikën
(11.9.2009 RV)Nga data 4 deri
më 25 tetor në Vatikan do të mbahet Sinodit i Ipeshkvijve për Afrikën. Bëhet fjalë
për Asamblenë e dytë të veçantë të episkopatit kushtuar këtij kontinenti, 15 vjet
pas Sinodit të parë që u mbajt në vitin 1994. Ndër temat që do të trajtohen në Sinod
janë: të drejtat themelore të njeriut, inkulturimi i Ungjillit, angazhimi i Kishës
për paqen në realitetin e ri të pluralizmit demokratik e të mediave e tema tjera të
rëndësishme për Afrikën. Po njëri ndër synimet e këtij Sinodi është sjellja e vlerave
të pajtimit, të drejtësisë e të paqes në Afrikë, në një kontinent që shpesh, madje
tepër, është i goditur nga konfliktet dhe emergjencat humanitare. Po si mund të transmetohet
vlera e paqes dhe mirëkuptimit, posaçërisht tek të rinjtë? Të dëgjojmë imzot Nikolas
Dzhomo, president i episkopatit të Kongos: “E ardhmja e Kongos varët nga njeriu
që formojmë sot. E ky formim kalon përmes arsimit e në mënyrë të posaçme të edukimit
dhe një kulture të paqes. Aktualisht, në shkollat fillore kemi programe për t’iu folur
fëmijëve më të vegjël për paqen përmes identifikimit me Krishtin e për t’u thënë atyre
se i afërmi, tjetër jam unë e se e keqja që nuk mund t’ia bëj vetvetes, nuk duhet
t’ia bëj as të afërmit tim. Është pra një program që ka filluar të jap rezultate të
mira e kështu punojmë së bashku me Kishat tjera, në mënyrë që të arrihen të gjitha
bashkësitë e besimtarëve në Vendin tonë, bashkësitë e krishtera e jo të krishtera”.