Dhuna kundër grave. U mbyll në Romë konferenca Ndërkombëtare.
(10.09.2009 RV)140 milionë gra
nëpër botë janë viktima të abuzimeve fizike si gjymtime të organeve gjenitale, apo
të dhunës psikologjike, seksuale e deri të skllavërisë. Kjo është shifra tronditëse
që u bë e ditur në Romë, gjatë punimeve dyditore të Konferencës Ndërkombëtare mbi
dhunën kundër grave që u mbyll sot, organizuar në kuadër të G8. Dokumenti që u nënshkrua
nga pjesëmarrësit përmbledhë një sërë masash konkrete që duhen marrë për ta luftuar
këtë dukuri. Ky dokument do të shqyrtohet në mbledhjen e ardhshme të G8 të ministrave
të jashtëm, në program për në fund të këtij muaji.
“Duhet ta ndjejmë veten
përgjegjës që nuk është bërë sa duhet për afirmimin e lirisë, të dinjitetit dhe të
barazisë e të të drejtave të grave”. Me këto fjalë presidenti italian Xhorxho Napolitano
hapi dje punimet e kësaj konferencës që ishte organizuar me nismën e Ministrisë së
Jashtme të Italisë. Pjesëmarrësit që morën fjalën vunë në dukje se denoncimet
që bëhen nëpër botë për përdhunimet, për dhunën brenda mureve të shtëpisë, për dhunën
që ushtrohet gjatë konflikteve të armatosura, nuk janë veçse maja e ajsbergut. Në
konferencë morën pjesë përfaqësuese të grave nga Irani, Afganistani, Maroku, Kina,
Arabia Saudite e Nigeria të cilat me fakte e shifra konkrete sollën dëshmi mbi gjendjen
e grave nëpër këto vende. Ja dëshmia e gjykatëses Marsha Bazel nga Afganistani:
Përgjigje:
Unë drejtoj shoqatën “Afganistan Progressive Law Organization”, një shoqatë legale
që ka si synim mbrojtjen e grave nga dhuna në familje. Shumica e popullsisë afgane
përbëhet nga gratë. Ato janë 55 përqind. Kemi raste kur ndaj vajzave shumë të reja,
të porsamartuara, ushtrohet dhunë jo vetëm nga ana e burrave por edhe nga të afërmit.
Ne i nxisim gratë të dalin haptas, t’i denoncojnë këto raste. Por shpeshherë kur ato
ngrenë krye, bashkëshortët i denoncojnë për kurorëshkelje, duke thënë se kanë ikur
nga shtëpia me burra të tjerë. Pikërisht këtyre grave ne iu bëhemi krah dhe i ndihmojmë
nga pikpamja ligjore. Fatkeqësisht janë ende shumë të pakta gratë që na drejtohen
ne. Të tjerat nuk kanë guxim të vinë në zyrat tona sepse kanë frikë nga hakmarrjet.