Përfundoi në Krakovi, takimi “Njerëz dhe fe”. Nga krerët e feve, thirrja për paqen,
pa hakmarrje.
(09.09.2009 RV)Përfundoi mbrëmë
me një lutje të madhe ndërfetare, konferenca ndërkombëtare “Njerëz e fe: Fryma e Asizit
në Krakovi”, organizuar nga Bashkësia e Shën Egjidit e nga kryedioqeza e qytetit,
ku Karol Vojtila qe ipeshkëv, para se të bëhej Papa Gjon Pali II. Propozimi për të
krijuar një regjistër evropian ku të shënohen të gjitha episodet e racizmit ishte
ndoshta pika kulmore e këtij takimi, të cilin e përshëndeti edhe Papa Benedikti XVI
të dielën, gjatë Lutjes së Engjëllit të Tënzot. Thirrja për arritjen e paqes përmes
vëllazërimit, miqësisë e dialogut ndërmjet popujve iu dorëzua edhe krerëve politikë,
që merrnin pjesë në takim. Takimi i ardhshëm do të zhvillohet në Barcelonë të Spanjës,
në vitin 2010. Lutja për paqen, u kujtua mbrëmë, ndërsa në tribunë ndërroheshin
përfaqësues të feve të ndryshme nga e gjithë bota, është themelore për botën. Le të
vlejë një shembull për të gjithë: në vitin 1989, në Varshavë u bë një lutje e jashtëzakonshme
për paqen. Pak muaj pas saj, ra Muri i Berlinit. Për besimtarët kudo në botë, u tha
në Takimin e organizuar nga bashkësia e Shën Egjidit, historia nuk është rastësi,
por edhe rezultat i lutjes. E pikërisht lutja e djeshme u parapri nga marrshimi
i heshtur i krerëve fetarë në kampin e përqëndrimit të Aushvicit, ku hebrenj, myslimanë,
të krishterë, budistë e përfaqësues të feve të tjera përsëritën impenjimin e tyre
kundër dhunës dhe urrejtjes racore. Por ç’duhet bërë që bota të mos bjerë më në kurthin
e luftës? Përgjigjet në mikrofonin tonë, ish-ati shpirtëror i Bashkësisë së Shën
Egjidit, ipeshkvi i Amelia-Narni-Ternit, imzot Vinçenco Palia: Arti i paqes
nuk përbëhet nga një gjest i vetëm dhe i mbyllur në vetvete. Artizani punon çdo ditë,
duke vendosur një gur pas tjetrit. Ato që e bëjnë të qëndrueshme paqen nuk janë gjestet
e mëdha, por kthimi i zemrave të çdo personi. Kjo është puna. Para sprovave
të mëdha, që tregojnë se në ç’pikë mund të arrijë urrejtja njerëzore, si mund të shmangim
dëshirën për hakmarrje? Na e shpjegoi rabini Israel Meir Lau kur tha se mënyra
e vetme për ta çrrënjosur hakmarrjen është dashuria, takimi. Hakmarrja ka të njëjtën
logjikë me urrejtjen e bëhet kështu një lloj fare e dhunës në fushën e jetës. Fatkeqësisht,
në botën ku jetojmë, falja dhe miqësia janë të rralla. Është e lehtë të mendosh se
lumturia arrihet duke mbrojtur vetëm vetveten, duke shkuar kundër të tjerëve. Por
është ide e gabuar. Duke ardhur këtu, në ferrin e Aushvicit, kuptojmë se e vetmja
rrugë është ajo që na ka mësuar Jezusi.