Papa për Ditën Misionare Botërore: Kisha ekziston për të sjellë shëlbimin e Krishtit për të gjithë popujt

(12.09.2009 RV)“Kombet do të ecin në dritën e Tij”: ky është titulli i Mesazhit të Papës për Ditën Misionare Botërore, që Kisha do ta kremtojë të dielën, më 18 tetor. Misioni thelbësor i Kishës, pohon Benedikti XVI në mesazh, është t’u çojë popujve shëlbimin e Zotit përmes Birit të Tij të mishëruar. Kisha e misionit, vazhdon Ati i Shenjtë, duhet të ndjejë ankthin dhe pasionin për të ndriçuar popujt me dritën e Krishtit, për t’iu dhënë atyre shpresë.
Misioni i Kishës në botë ka njohur fitore të jashtëzakonshme, nënvizon Papa, por aktualisht duket sikur e ka humbur sensin e qëllimit të tij përfundimtar. Shërbimi i Kishës nuk është të plotësojë ato nevoja materiale e shpirtërore, që zgjasin sa zgjat jeta e njeriut mbi tokë, por të sjellë shëlbimin hyjnor, karakteristik për Mbretërinë e Hyjit. Është e vërtetë që Mbretëria e Hyjit nuk është e kësaj bote, shpjegon Papa, por ajo është e kësaj bote në formën e drejtësisë, paqes, lirisë së vërtetë dhe respektit për dinjitetin e çdo njeriu. Kisha synon ta shndërrojë botën me shpalljen e Ungjillit të dashurisë, që largon retë dhe errësirën e na jep guxim të jetojmë e veprojmë.
Papa kujton sa e sa misionarë e misionare, që e dëshmojnë dhe përpiqen ta ndërtojnë Mbretërinë e Zotit në gjendje persekutimi apo shtypjeje, e cila shkon nga diskriminimi shoqëror e deri tek burgu, torturat e vdekja. Kisha, shpjegon Benedikti XVI, nuk vepron sipas logjikës njerëzore ose asaj të forcës, por ndjek rrugën e Kryqit të Krishtit.
Papa i fton katolikët të mbështesin misionarët, misionaret dhe bashkësitë e krishtera të impenjuara në linjën e parë të frontit në këtë mision të vështirë dhe të japin një shenjë të besueshme bashkimi ndërmjet Kishave, përmes ndihmës ekonomike për Kishat më të varfëra.