Mijëra vetë në Viterbo për Meshën e kryesuar nga Papa Benedikti XVI. Pasdite, vizita
në Banjorexho
(06.09.2009 RV)Papa Benedikti XVI
ishte sot për vizitën e tij të 16-të baritore brenda territorit italian, në Viterbo
e Banjorexho. Nga Qyteti i Papëve tek ai i Shën Bonaventurës: vizita i dha shkas Atit
të Shenjtë të prekë Kishën e djeshme e atë të sotme, të inkurajojë banorët të shohin
me guxim drejt së ardhmes e madje, të kujtojë edhe Luftën II Botërore, përmes përshëndetjes
për Kongresin Ndërkombëtar “Njerëz e Fe”, organizuar nga Bashkësia e Shën Egjidit,
që ka filluar sot në Krakovi të Polonisë me temën “Fetë dhe kulturat në dialog”. Papa
mbërriti në Viterbo rreth orës 9, përshkoi me makinë qytetin dhe bekoi portat e reja
të Duomos. Më pas i bëri një vizitë ipeshkvit të vendit, imzot Lorenco Kiarinelit
dhe pa Sallën e Konklavës të Pallatit të Papëve, ku ndodhen varret e pesë papëve.
Pas Meshës e Lutjes së Engjëllit të Tënzot, Benedikti XVI qëndroi në Shenjtëroren
e Shën Rozës, për të nderuar trupin e saj të pakalbur, apo të pakorruptuar, dhe përshëndeti
ata që e kanë mbajtur në krah Makinën e Shën Rozës, në ditën e procesionit kushtuar
pajtores së Viterbos. Pasditja në Banjorexho u karakterizua nga një reflektim i nivelit
të lartë mbi Shën Bonaventurën, shenjt i lindur pikërisht në këtë qytet, i cili citohet
edhe nga Dante në Komedinë Hyjnore. Por t’i kthehemi Meshës së Viterbos në sheshin
Faul, pranë Pallatit të Papëve. Gjatë homelisë, tingëlloi i qartë që në fillim mesazhi
i Papës: “Guxim, mos kini frikë!”. Duke komentuar Ungjillin e sotëm, Ati i Shenjtë
vuri në pah rrezikun që vjen nga vetmia e egoizmi dhe i tregoi Kishës së Viterbos
rrugën për të dalë nga amullia e nga frika e së nesërmes, për të cilën folën si ipeshkvi,
ashtu edhe kryetari i bashkisë, në përshëndetjen drejtuar Benediktit XVI. Tri janë
përparësitë, u tha atyre Papa Racinger: edukimi në fe, dëshmia e fesë dhe vëmendja
ndaj shenjave që na dërgon Zoti. Ati i Shenjtë kujtoi rolin e rëndësishëm edukativ
të Universitetit të Tushës dhe të Institutit Filozofiko-teologjik “Shën Pjetri”, po
ashtu edhe figurën e Shën Roza Venerinit, shpallur shenjte prej tij tri vjet më parë,
e cila punoi për shkollat femërore në Itali: “Nga këto burime shpirtërore mund
të frymëzohemi akoma për të përballuar, me qartësi dhe koherencë, përparësinë aktuale,
të pashmangshme, të “emergjencës edukative”, sfidë e madhe për çdo bashkësi të krishterë
e për krejt shoqërinë”. Papa bëri thirrje për më shumë nisma vullnetariati,
në ndihmë të më të varfërve e më të braktisurve, kërkoi më tepër solidaritet për familjen,
gjëra për të cilat duhet të punojë politika e të drejtohet impenjimi shoqëror i njerëzve.
Homelia përfundoi me një lutje të veçantë: “Gjatë këtij Viti Meshtarak, lutuni
me intensitet më të madh për meshtarët, për seminaristët e për vokacionet, që t’i
qëndrojnë besnikë thirrjes së tyre! Shenjë e Zotit të gjallë duhet të jetë, gjithashtu,
edhe çdo person i shuguruar e çdo i pagëzuar”. Në momentin e kungimit, besimtarët
e morën hosten e shuguruar nga duart e kardinalit vikar Agostino Valini, pasi Papa
Benedikti XVI preferoi të mos e përdorë dorën e thyer në gusht. E më pas, gjatë Lutjes
së Engjëllit të Tënzot, duke falenderuar për mikpritjen, Papa u kërkoi besimtarëve
të luten për të: “Përforcoi në fe vëllezërit e tu”: këtë ftesë të Hyjit e ndjej
që sot më drejtohet mua me intensitet të veçantë. Lutuni, të dashur vëllezër e motra,
që ta kryej gjithnjë me besnikëri e dashuri misionin e Bariut të krejt grigjës së
Krishtit”. Një mendim i veçantë për pjesëmarrësit e Kongresit ndërkombëtar
“Njerëz dhe fe”, që mbahet në Krakovi të Polonisë, me temën “Fetë e kulturat në dialog”,
70 vjet pas fillimit të Luftës II Botërore, e cila shkaktoi miliona viktima e vuajtje
të patreguara për popullin polak. Një konflikt, ku u luajt tragjedia e Holokaustit
dhe u shfarosën aradheve të pafajshme, theksoi Papa: “Kujtimi i këtyre ngjarjeve
të na shtyjë të lutemi për viktimat e për ata që akoma kanë plagë në trup e në shpirt;
qoftë edhe paralajmërim për të gjithë, që të mos përsëriten barbarizma të tilla e
që të shumëfishohen përpjekjet për të arritur, në kohën tonë, të shënuar akoma nga
konflikte e kundërvënie, një paqe të qëndrueshme, duke u përçuar sidomos brezave të
rinj, një kulturë e mënyrë jetese të karakterizuara nga dashuria, solidariteti dhe
vlerësimi për tjetrin”.