Германія: Цэрквы і алімпійскі камітэт заклікаюць да барацьбы з прыманьнем допінгу
Дзве вядучыя Царквы ў Германіі, а таксама Алімпійскі камітэт Германіі
(DOSB) у супольным дакуменце, абнародаваным у Франкфурт-на-Майне, заклікаюць да рашучай
барацьбы з допінгам. Усялякія парушэнні здаровага спартыўнага спаборніцтва, як адзначана,
неабходна паслядоўна асуджаць і караць. Адначасова ў дакуменце падкрэсліваецца,
што кожны чалавек мае права прымаць удзел у сацыяльным жыцці, незалежна ад свайго
паходжання, светапогляду і рэлігіі. Такім чынам аўтары асуджаюць усялякія формы размежавання
і дыскрымінацыі. Як Цэрквы, так і алімпійскі камітэт крытыкуюць «нарастаючую камерцыялізацыю
нядзелі». «Цэрквы і спорт выказваюцца за захаванне нядзелі днём вольным
ад працы, — чытаем у дакуменце, — днём, які прызначаны для наведвання Касцёла, для
адпачынку і спорту». Аўтары дакумента, між іншым, настойваюць, каб урокі рэлігіі і
спорту былі абавязковымі прадметамі ва ўсіх школах. Падкрэсліваецца таксама,
што Цэрквы і спартыўныя арганізацыі адчуваюць адказнасць за тое, каб — асабліва ў
наш няпэўны час — для людзей была створана прастора, напоўненая кліматам даверу і
бяспекі, у якой можна свабодна сябе рэалізоўваць. Дакумент быў падрыхтаваны
21 жніўня 2009 г. у Франкфурце падчас сустрэчы кіраўнікоў Каталіцкага Касцёла і Евангельскай
Царквы ў Германіі, а таксама Алімпійскага камітэта Германіі.