Papa me rastin e Simpoziumit ndërkristian: së bashku për ndërtimin e qytetit të Zotit
në paqe e dashuri
(03.9.2009 RV)Të njohësh “pasuritë
doktrinore e shpirtërore që formojnë thesarin e lindjes e të perëndimit të krishterë,
bëhet çështje e domosdoshme” për “të promovuar një vlerësim më të mirë të anasjelltë
ndërmjet të gjithë të krishterëve”. Këtë nënvizon Papa Benedikti XVI në një mesazh
dërguar kardinalit Walter Kasper, president i Këshillit Papnor për Promovimin e Bashkimit
të të Krishterëve, me rastin e hapjes së sotme të Simpoziumit të XI ndërkristian mbi
Shën Agostinin. Punimet e këtij Simpoziumi ndërkombëtar që ka për temë “Shën Agostini
në traditën perëndimore e lindore” do të zgjasin deri më 5 shtator. Ati i Shenjtë
Racinger uron që Simpoziumi të jetë “ shtytje për të zbuluar konvertimet doktrinore
e shpirtërore që shërbejnë për të ndërtuar së bashku Qytetin e Zotit, ku bijtë e tij
mund të jetojnë në paqe e në dashuri vëllazërore të bazuar mbi të vërtetën e fesë
së përbashkët”. Mesazhi i Benediktit XVI përqendrohet mbi temën e Simpoziumit. Shën
Agostini, një ndër Etërit e mëdhenj të Kishës Latine, vëren Papa, ka “një rëndësi
themelore për teologjinë e për vet kulturën perëndimore, derisa perceptimi i mendimit
të tij në teologjinë ortodokse është treguar disi më problematik”. Duke u nisur nga
kjo, vërehet nevoja e thellimit të veprës së autorit të Rrëfimeve. Papa Racinger përgëzon
“këtë nismë vëllazërore takimi e ballafaqimi mbi aspektet e përbashkëta të spiritualitetit,
që është limfë e mirë për një marrëdhënie më të gjerë ndërmjet katolikëve e ortodoksëve
“. Fakti që sivjet punimet e këtij Simpoziumi zhvillohen në Romë, Benedikti XVI e
vë theksi mbi përkujtimit e Apostujve Pjetër e Pal si “nxitje e fortë për të avancuar
drejt bashkimit të plotë”. Takimi është organizuar nga Instituti Françeskan i Spiritualitetit
të Universitetit Papnor Antonianum i Romës dhe nga Fakulteti Teologjik Ortodoks i
Universitetit Aristoteli i Salonikut.