Çelësi i fjalëve të Kishës: kuptimi i "frymëzimit hyjnor"
(24.08.2009 RV)“I tërë Shkrimi Shenjt, hyjnisht i frymëzuar, është i dobishëm
për të mësuar, për të bindur, për të ndrequr, për të edukuar në drejtësi”. Kështu
shkruante Shën Pali Apostull në letrën e dytë dërguar dishepullit të vet Timoteut
(II, 3,16). Ndërsa në Letrën e dytë të Shën Pjetrit theksohet se “askurrë nuk ndodhi
ndonjë profeci me vullnet të njeriut, por njerëzit, të frymëzuar prej Shpirtit Shenjt,
folën nga ana e Hyjit” (1,21). Gjithnjë ka ekzistuar vetëdija se në Shkrimin
Shenjt lexojmë fjalën e Zotit, të shprehur përmes fjalëve të njerëzve. Mesazhi i përjetshëm
i Zotit mishërohet në gjuhën e njerëzve, që merr kështu trajtat e një komunikimi më
të lartë, pavarësisht se të lidhur me historinë dhe kulturën e epokës. Frymëzimi –
kështu është quajtur nga teologët ky proces – paraqitet mjaft i ndërlikuar, pasi,
nga njëra anë, duhet të shprehë lirinë hyjnore dhe vullnetin e Zotit, por nga ana
tjetër, duhet edhe të ruajë lirinë e njeriut të zgjedhur për të komunikuar vullnetin
suprem. Frymëzimi, i konceptuar si shfaqje e vullnetit të Hyjit, ka qenë shpesh
një argument debatesh të ashpra, pasi ka të bëjë drejtpërdrejt me atë që mund të quhet
e zbuluar nga Zoti në Shkrimin Shenjt. Domethënë, cilat janë shkrimet dhe personat,
me të vërtetë të frymëzuar nga Zoti? Edhe këtu, është Shpirti Shenjt ai që i shndrit
njerëzve mendjen për të vendosur sa duhet shtrirë Fjala e zbuluar, duke shmangur çdo
devijim, ose falsifikim. Një problem tjetër i lidhur me frymëzimin hyjnor është
fakti që Shkrimet e Shenjta bien shpesh ndesh me informacionin historik, apo filozofik
e madje edhe me atë shkencor. Në të vërtetë, siç theksoi Koncili II i Vatikanit, në
Kushtetutën “Dei Verbum”, Bibla na komunikon të vërtetën shëlbuese, duke e shprehur
me një gjuhë e kulturë të epokës kur është shkruar. “Librat e Shkrimit Shenjt –
thuhet në Kushtetutë – na mësojnë me siguri, me besnikëri dhe pa gabime të vërtetën
që Zoti, për shpëtimin tonë, deshi ta zbulojë përmes Letrave të Shenjta” (n.11).
Frymëzimi hyjnor, pavarësisht së është një argument i vështirë për teologët, na çon
gjithnjë tek ajo që shprehet më së miri me fjalët e profetit Isaija: “Shpirti i
Zotit Hyj është mbi mua…; më dërgoi t’u sjell të përvuajturve lajmin e mirë” (Isaija
61,1).