Kardinali Uroza: të rinjtë venezuelanë kanë nevojë për mësimin e besimit në shkollë.
(23.08.2009 RV)“Të rinjtë kanë nevojë për mësimin e besimit në shkollë, ashtu
si kanë nevojë për mësimin e fizikës, për artet e për lëndë të tjera, që i ndihmojnë
të përgatiten në mënyrë të gjithanëshme, për të ecur me siguri në rrugën e jetës”.
Kështu iu përgjigj këto ditë kryeipeshkvi i Karakasit, kardinali Horhe Uroza, pyetjeve
të gazetarëve, pak orë pas hyrjes në fuqi të ligjit mbi rishikimin e sistemit edukativ,
që e përjashton mësimin e besimit nga programet shkollore. “Është një vendim, që duket
i diskutueshëm nga pikëpamja ligjore, sepse dispozita parashikohet në një ligj të
miratuar e tani, edhe të garantuar, nga neni 59 i Kushetutës”. Për kryeipeshkvin e
Karakasit, ligjet duhet ta bashkojnë, jo ta përçajnë kombin e të shprehin konsensusin
kombëtar. E kjo, sepse një pjesë e mirë e venezuelanëve po i kundërvihen këtij vendimi,
duke kërkuar të miratohet përfundimisht vetëm pas një referendumi mbarëpopullor. Ndërkaq
grupe të vogla simpatizantësh të regjimit kanë nisur të sulmojnë Kishat, të prishin
atmosferën e Meshëve, të brohorisin në Kishë për presidentin Çavez e për rishikimin
nga ana e tij të sistemit edukativ në vend. Për më tepër, është shpërndarë edhe një
tekst me titull: “Hjerarkia katolike është tradhtare e armike e popullit”; “Ipeshkvijtë
janë kundër kombit” – parulla që të kujtojnë persekutimet e vjetra e të reja kundër
Kishës katolike, barinjve e besimtarëve të saj, të cilët tani, në Venezuelë, kanë
frikë edhe nga sulmet fizike. Pas këtyre fakteve, një pjesë e mirë e shtypit venezuelan
i është kundërvënë qëndrimeve të tilla dhe ka kërkuar nga autoritetet dënimin e autorëve
të akteve të papërgjegjshme e krejtësisht të huaja për ndjenjat fetare të vendit.